Kurup ka ED ia ki nongkynti ba kot T20.28 klur ha ka jyrsieh ai degree thok ka CMJ University

Shillong, Naitung 21 : Ka Directorate of Enforcement (ED), Shillong Sub-Zonal Office, kala pynmih ia ka hukum ban kurup shuwa shipor (Provisional Attachment Order) ia ki nongkynti ba shongdor T.20.28 klur jong u Chandra Mohan Jha, Chancellor ka CMJ University, bad ki bahaiing hasem jong u hapoh ki kyndon ka Prevention of Money Laundering Act (PMLA), 2002.

Ka hukum bala pynmih ha ka 3 tarik Naitung 2025, ka kynthup ia 4 tylli ki Iing ha New Delhi kiba shongdor T.19.29 klur bad ka pisa ba T.1 klur ba don ha bank. Ka ED ka ong ba kine ki nongkynti ki don jingiadei bad ki kam bymman bala leh da u Jha bad kiwei kiwei lyngba ka jingdie tuh ia ki degree thok napoh ka University.

Ka ED kala pynlong ia ka jingtohkit halor ka ejahar bala mudui da ka CID Police Station, East Khasi Hills, kaba la pynshong nongrim halor ka jingujor jong u Ophisar IAS MS Roa, kaba long kat kum ka jingbthah u Lat barim ka Jylla, uba shakri kum u Visitor ka University.

Ka jingtohkit ka CID kala shem ia bun bah ki kam leh thok ha CMJ University, khamtam ka jingdie ia ki degree thok, kaba la kynnoh pynioh kamai haduh T.83 klur.

Kane kam dei ka sien ba nyngkong b aka ED kan kurup ia ki nongkynti ha kane ka jingjia. Ha ki hukum kurup nongkynti bala dep, kaba la pynmih ha ka 31 tarik Naiwiang 2017, 30 tarik Naiwieng, 2021 bad 11 tarik Naitung, 2024, ka ED kala kurup ia ki nongkynti kiba shongdor haduh T.27.66 klur, T. 13.54 klur bad T. 7.56 klur. Baroh kine ki dei kiba don jingia dei bad u CM Jha bad ka iing ka sem jong u.

Kane ka jingkurup ba mynta ka dei kaba la leh da ka ED hadien ka jingpynlong ia ki jingkhynra ha kylleng ki jaka ha u bnai Nohprah 2024, ha kaba kala ioh ban kurup ia ki bank account bad nongkynti.

Ka kynhun tohkit kala lap ruh ba T.1 klur la phah sopsop da u Jha sha ka account ki bahaiing ha ka 16 tarik Nohprah, 2024, ba kan lait na ka jinglap. Ia kane ka pisa la lap pat hadien bad ka dei shibynta ha ka jingkurup ba mynta.