Shillong, Nohprah 12 : Ka Directorate of Enforcement (ED), Shillong Sub-Zonal Office, kala kurup ia ki nongkynti kiba shongdor haduh T.17.91 klur ba iadei bad ki kam shukor ha ki jingkynshew pisa lyngba ka website Pearlvine.com, kaba pyniaid da ka kompani Pearlvine International.
Kine ki nongkynti ki kynthup ia 13 tylli ki Iing bad 7 tylli ki kali ba kynthup ia ki kali rem dor kiba la thied na ka pisa ba lum na kane ka kam shukor.
Kat kum ka jingiathuh ka ED, kane ka jingkurup ka dei kaba la leh halor ka ejahar bala mudui da ka Tnad CID ka Tnad Meghalaya Police, kaba la pynshong nongrim na ka jingujor jong ka RBI. Ka jingtohkit kala pynleit jingmut na ki skhim thok kiba la pyniaid ha kylleng ka ri India hapdeng u snem 2018 bad Lber 2023, bad ioh lum pisa na ki lak ngut ki nong kynshew.
Ka Pearlvine Internatonal, ka kompani ba khlem pat register ialade bad kam ba dei ka kompani na USA, kala pynbiej ia ki nongkynshew da ka skhim ban ioh kamai bun shah bad phah thep pisa tang T.2,250 kum ka bai rung dkhot. Hapoh u 2022, la kam ba kila don haduh 80 lak ngut ki briew bala rung dkhot ha India bad nabar ri ruh kumjuh.
Ka jingtohkit ka ED ka pynpaw ba kane ka kompani kala ioh lum pisa kumba T.1,575 klur, ha kaba haduh T.395.35 klur ka dei ka pisa ka bym pat siew sha ki nongkynshew.
Ka ED kala ithuh ia u Neeraj Kumar Gupta kum u nongsuhbuit ha lyndet kane ka jyrsieh, bad u dei uba la thied ia ka pearlvine.com domain ha u snem 2015 bad leit pynlong ruh ia ki seminar ha kylleng ka ri India bad Thailand ban pyniaid iew ia kane ka skhim thok.
Da kane ka jingkurup, ki nongkynti bala kurup baroh lang da ka ED ha kane ka case kala kot ia ka T.54.98 klur, kynthup ki nongkynti bala kurup hashuwa kiba shongdor T.37.07 klur.
Ka ED ka pyntip ba ka jingtohkit mynta ka dang iaid shakhmat.
, Shillong Sub-Zonal Office, kala kurup ia ki nongkynti kiba shongdor haduh T.17.91 klur ba iadei bad ki kam shukor ha ki jingkynshew pisa lyngba ka website Pearlvine.com, kaba pyniaid da ka kompani Pearlvine International.){kind=link}