Shillong, K’Lyngkot 31: U Director ka NEIGRIHMS u Dr. Nalin Mehta hynne ka sngi ula hap ban mih sha phyllaw ban panmap naki nongialam ka HYC halor ka jingkynnoh ia ka Seng ba ka wan pynkulmar ha kamra jong u dang shen.
Ki nongialam ka HYC kila leit sha NEIGRIHMS halor ka jingkhot jong u Director ban iakren ia ki mat jingdawa ba ka Seng kala buh bad aipor ia ka NEIGRIHMS ban pyntreikam.
La ong ba haba ki Nongialam ka Seng kila poi ha Ophis, la kynnoh ba une u Khliehduh ka NEIGRIHMS ula shu kynhied bad pynmih ia ki jingkynnoh ba ka Seng kala wan da ka jingkhluit khlieh bad ka jingthmu pynkulmar haba pynkynmaw ia ka jingjia ba 19 tarik, ka sngi ba ka HYC ka leit buh ia ka dorkhas.
Namar kane ka jingpyni jinglong u Director, ka HYC kala mih jyndat noh napoh ka kamra jong une u Khliehduh ka NEIGRIHMS ryngkat ka kura miej bad pynpait ia ki katto katne ki Iit nalor ka jingbyrngem ban khang tala shisyndon ia ka Ophis treikam jong u.
Kane ka jingjia kala pur sted bha bad tang shipor, la wan poi ki Magistrate bad ki Pulit ha NEIGRIHMS ban tehlakam ia kano kano ka jingkulmar.
Dei hadien ka jingtuklar jong ki Magistrate, une u Khliehduh ka NEIGRIHMS ula hap mih sha phyllaw bad pan map na ki Nongialam ka HYC haba khot biang ia ki ba kin wan sha ka miej jingiakren halor ki mat jingdawa jong ka Seng.
Haba kren sha ki lad pathai khubor u President ka HYC u Bah Roykupar Synrem ula iathuh ba ka Seng kala leit sha NEIGRHIMS halor ka jingkhot u Dr. Nalin Mehta ban iakren ia ka dorkhas ba ka seng kala aiti, kaba kren ia ki jingdawa jong ka Seng.
U bah Roykupar u pyntip ba ki jingdawa ki kynthup ia ka kam thung nos kaba la pyniaid mynta lyngba ka Nursing Officer Recruitment Common Eligibility Test (NORCET) kaba pynduhlad ia ki nos trai Jylla ban iohkam ha NEIGRIHMS, ka jingaiwai ia ki kam (outsource), ka jingthungkam ba 80% ia ki trai muluk ha ka Group B bad C, ban thungkam pura noh ia ki nos kiba trei lyngba ka contract bad kiwei kiwei.
Haba wan panmap, u Director ka NEIGRIHMS u Dr. Nalin Mehta ula kyntu ia ki Nongialam ka HYC ban iaklet noh ia kaei kaei kaba la jia bad ula khot biang ban iakren halor ki mat jingdawa.
Hynrei ki Nongialam ka HYC kila kyrngah bad phah pynbeit ia u da kawei pat ka sngi ban iakynduh bad iakren bha ia kiei kiei baroh.
