Guwahati, Nailar 10:U MP ka Seng Congress na Assam u ba dei ruh u symbud nongialam ka liang pyrshah ka Lok Sabha, u Gaurav Gogoi u la kyntu ia ki party riewlum ka thain shatei lammihngi (Northeast) jong ka ri ba ki dei ban long ki ba husiar ia ka BJP.
Da ka ba pyni nuksa na kaei ka ba la jia ha Bihar, ha ka ba ka party jong u Nitish Kumar ka JD-U ka la pynkut noh ia ka jingiadei bad ka BJP namar ka jingpyrshang ka jong ka ban pynkut ia ka jingiateh.U la ong ba ka BJP ka don ia ka jingthmu ban pynpra ia ki party riewlum ha ka thain Northeast.
U la ong ruh ba ka BJP ka don ia ka jingthmu ban pyntreikam da ka sienjam kumba ka la laleh hapoh Maharashtra ha ka thain Northeast ban pynpra ia ki party riewlum.
Une u MP ka Assam u la ong ba ki party riewlum ha ki jylla Northeast ki ban sa leit sha ka ilekshon ha kane ka snem ka ban wan ki dei ki ban kham ngat ha kine ki buit sianti jong ka BJP.
Lah ban kdew ba ia ka ilekshon sha ka iingdorbar assembly ha ki jylla ka thain Northeast ha Meghalaya, Nagaland bad Tripura la pynkhreh ban pynlong ha ki bnai ba shakhmat jong ka snem 2023.Hadien kane yn bteng ia ka jingpynlong ia kane ka ilekshon sa ha Mizoram bad kiwei pat ki jylla ka thain Northeast.
“Kumba long ha Bihar, ki party riewlum ha Northeast ki dei ban long ki ba husiar.Ka BJP ka la don lypa ia ka jingthmu ban pyntreikam da ki juh ki buit kumba la leh hapoh Maharashtra, khamtam ha kito ki jylla ki ba la pynkhreh ban leit sha ka ilekshon,” ong u MP ka Congress na Assam u Gaurav Gogoi.
Kane ka jingpynpaw da une u nongialam Congress na Assam ka la wan long ruh hadien ba u Nitish Kumar u la shim smai kum u Myntri Rangbah (CM) ka Bihar ha ka sien ka ba phra hadien ba ka la pynkut noh ia ka jingiateh bad ka BJP ha kane ka sngi ba Ar ba la lah.
Ka kynhun synrop ka ba thymmai jong ka sorkar hapoh Bihar ka kynthup ia hynniew tylli ki party bad ki MLA shimet.
