Ka jingkyrmen ia ki longkmie kiba pun khun bad ki khunlung
Shillong, Naiwieng 07: Kaei kaba la sdang kum ka jingkular ia ki paidbah ha ka jingpynlong ia ka CM-Connect mynta kan sa urlong noh shi syndon da ka kam.
Ka jingangnud kaba la slem ban kyntiew bad pyntreikam ia ka Maternal & Child Health (MCH) Hospital ha Nongstoin kaba la pynbna da u Myntri Rangbah ka jylla u Conrad K. Sangma yn sa pyndep noh bad ban ban pynkhreh ban ai noh ia ka jingshakri shwa ka Khristmas, kaban long u mawjam uba kongsan na ka bynta ka jingioh jingsumar ki longkmie kiba pun khun bad ki khunlung hapoh West Khasi Hills.
Ha ka 6 tarik u Naiwieng 2025, ka kynhun kaba la ialam da u Principal Secretary ka tnad ka koit ka khiah u Sampath Kumar kala leit jurip ia ka jingtei ia kane jaka sumar bad ha ka jingkhmih bniah la shem ba lah jan dep artad ban pyndep noh ia ka jingtei. Kane ka kynhun kaba leit jurip ka kynthup ruh ia ki heh ophisar sorkar na ka tnad ka koit ka khiah, ki bor pyniaid district bad na ki Public Health Unit.
Ka jingshna pynbha bad jingbuh ia ki kor ki bor ha ki jaka ai jingsumar kiba kongsan kum ka OPD, Laboratory Complex, Emergency Unit, Labour Room, ICU, NICU bad OT Complex kadei kaba lah dep ban pyndep bad kaba sah ka long sa tang ban shu pynbit pynbiang ia ki katto katne ki jingdonkam kiba malu mala.
Ki jingpyrshang mynta ki long ban pynleit jingmut ha kaban buh noh ia ki nongai jingsumar, ban pynpoi noh ia ki tiar ki tar bad ki dawai dashin bad ban pynkhreh ba ki Nurse kin ai jingshakri noh ban pynthikna ba ka jingtreikam kan iaid beit iaid ryntih naduh ka sngi kaba sdang pyntreikam.
Ha katei ka jingjurip, u Kumar ula banjur ia ka jingdonkam ban pynbiang thikna ia ka jingai jingsumar ha ka por kaba biang.
“Ka rukom treikam kaba ryntih katkum ki kyndon, ka long kaba kongsan bad ym dei ban pynslem ban ia ki jingsumar kiba paka ia ki kmie ne khunlung kiba donkam kyrkieh ia ka jingsumar” ula ong bad ka pyntip ba ka thong kaba kongsan eh ka long ban pynduna ia ka jingiap ki kmie kiba pun khun bad ki khunlung ha ki district.
Ban ialeh ban pynkhlain ia ka jingai jingshakri ia ki khunlung, ki heh ophisar kila tyrwa ruh ban buh ia ka District Early Intervention Centre (DEIC) ha katei ka hospital.
Nalor kane, ha ka 6 tarik u Naiwieng ka kynhun jong ka jylla kala leit ruh sha ka shnong Umwali kaba hap ha ka Mawshynrut Block, ha kaba kala lum ia ki nongmihkhmat na ka tnad ka koit ka khiah, Social Welfare, NRLM-MSRLS, ki bor pyniaid district bad ki kynhun kiba don ha katei ka shnong.
