Shillong, Nov 21: U Aaryavir Sehwag, u khun jong u nongialehkai Cricket ba pawnam ka ri u Virender Sehwag, ula kamai ia ka Double Century palat 200 run ha kaba ka Delhi kala lah ban tehlakam ia ka Meghalaya ha ka nsgi baar jong ka jingiakhun ia ka U-19 Men’s Cooch Behar Trophy Elite Group A kaba la long ha MCA Ground ha Polo hynne ka sngi Palei.
Haduh hynne ka sngi, ka Delhi kala kamai 468 run bad hap tang 2 wiket bad kala tam da 208 run ia ka Meghalaya kaba la kamai tang 260 run ha ka jingleit tied ha ka sien kaba nyngkong. U Aaryavir, uba la mih naduh kaba sdang ula kamai 260 run bad ym shim la out bad u Dhanya Nakra, ula kamai 98 run bad ym pat out. U Arnav Bugga, jong ka Delhi ula ioh ia ka Century bad ula kamai 114 run.
U kapten ka Meghalaya u Dipankar Baruah ula pyrshang ban wanrah bad pynkylla ia ki nongkawang bol hynrei ki nongtied ka Delhi kim shym la mad ia kano kano ka jingeh.
U Arnav ula ialehkai bha hynrei ula shah pynkhyllem noh ha u nongkawang bol ka Meghalaya u Rudra Singh Rathore katba u Vansh Jetley uba la kamai 43 run ula shah pynkhyllem noh ha u Kshitij Singhania.
Watla ki nongialehkai ka Delhi kila ialehkai bha hynrei uba la paw bha hi ha kane ka jingialehkai udei u Aaryavir uba la pyni ia ka jingtbit ka jongu ha ka rukom tied kaba la pynitynnad ia baroh.
Ha shwa kane, ka Meghalaya kaba la kamai 239 run bad hap 7 wiket bad hynne kala bteng ban tied ha ka sngi ka baar bad kala kamai tang 21 run hynrei kala lah ban kamai sa tang 21 run. U Kshitij ula kamai 62 run katba u Angkit Tamang ula kamai 29 run.
