Shillong, Nailar 07 : Ka Dorbar Hima bala khot da u Syiem ka Hima Langrin Nangtei Sing Syiemiong, ha ka sngi Thohdieng, kala wanrah ia ka jing kulmar kaba jur bad lam sha ka jingmynsaw bun ngut ki paidbah bad kumjuh ruh ki Pulit kiba wan pahara.
Kane ka Dorbar Hima ka dei kaba la pynlong haka shnong Phlangdiloin.
Kane ka jingkulmar kala mih hadien ka jingkynnoh ba u Syiem um shym la ailad ia ki Khun ki Hajar ba kin kylli jingkylli halor ki kam synshar khadar hapoh ka Hima khamtam ka jingkynnoh kam rikynti u Syiem ia ka khyndew ka Hima.
Haba iakren bad ki katto katne ki Khun ki hajar ka Hima, la iathuh ba baroh kiba poi sha ka Dorbar kila bitar lep ia ka jingkynnoh leh donbor u Syiem khlem da khein snep ia ki khun ki hajar kiba don shibun kiei kiei ban kylli bad tohkit ia u Syiem halor ki kam jaka puta, ki khajna, ka synshar khadar bad kiwei kiwei.
La kynnoh ba u Syiem u khlem ailad satia iano iano ruh ban buh jingkylli ne kylli jingkylli bad thmu ban shu pynkut jubor ia ka Dorbar khlem da ai ia ki jingpynshai kiba thikna sha u Khun u Hajar.
Ki iathuh ba dei kane ka daw ba ki paidbah kila pynkulmar bad poi iapynibor bad ki Pulit kiba wan ap pahara ia ka dorbar.
Ki iathuh ba kumba ar ne 3 ngut ki riew paidbah kila mynsaw na ka jingshah siat tyndong lyer pynsat khmat ha ki Pulit kiba pyrshang ban pynphriang ia u paidbah na katei ka jaka.
Haba kylli, ki Pulit ruh kila pynthikna ia kane ka jingkulmar bad iathuh ba ki don kumba 2-3 ngut ki riew paidbah bad kumjuh ruh ki Pulit kiba la mynsaw ha kane ka jingjia.
Ki Pulit ka South West Khasi Hills kila pynkhlain ia ka bor pahara ha ka thain ban pynthikna ia ka jingtehlakam noh ia kane ka jingkulmar.
U Syiem Nangtei Sing Syiemiong u iathuh ba ia kane ka Dorbar la khot pynlong na ka bynta ban pynshai ia ki jingkynnoh pyrshah jong ki katto katne ki kynhun, kiba la leit tur paidbah sha KHADC dang shen.
U iathuh ba ki jingkynnoh ki kynthup ia ka jingpyniaid ia ka Hima, ka jingkam rikynti bad ka jingtreikam ka Management Board.
“Ka jingkhot ia ka Dorbar ka long beit thik tang ban pynshai ia ki jingkynnoh baroh” ula ong.
