Shillong Rymphang 17: Ka Sorkar Jylla kan pyniaid shakhmat ia ka detailed project report jong ka Water Supply Scheme ka ban kynthup ia ka shnong Mukhap-Mokaiaw bad Motyrshiah ha Mokaiaw constituency, pyntip u Myntri ka tnad Public Health Engineering Marcuise N Marak ha ka iing dorbar thawain ka jylla hynne ka sngi Baar.
Kane ka project kan kynthup ia ka jingtei ia ka Dam bad ia ka Water Treatment Plant.
“Ia ka DPR dei ban pynkhreh noh mardor hadien ba la ioh ia ki jingbit kiba donkam” ong u Marak haba jubab ia ka jingkylli jong u MLA ka UDP u Bah Nujorki Sungoh.
U Sungoh ula ong, hapoh ka iing dorbar ba ka constituency ka jongu kala mad ia ka jingeh na ka jingkyrduh um.
“Nga lah wanrah ia kane ka jingkylli, kadei namar ba ngi lah mad ia ka jingkyrduh um man la ka snem. Haduh mynta kane ka jingeh ka dang don” ula ong bad ka kylli la ka sorkar kan pdiang ia kane ka jingtyrwa bad u Marak ula jubab da ong “hooid”.
U Bah Sungoh ula pynthikna ia u Myntri Sorkar ba kan ym don jingeh eiei ban ioh ia ka jaka.
U Marak ula ong ba ka tnad ka dang ap ban ioh ia ki jingbit.
“U Executive Engineer ula khot ia ka jingialang ha kaba iadei bad ka jaka hynrei haduh mynta ka tnad ka dang ap ban ioh ia ka jaka. Nga kyrpad ia u dkhot ban shimkhia lem bad ban phah ia ka no-objection certificate sha ka tnad” ula ong.
U Bah Sungoh ula pynpaw ba ki bor pyniaid shnong kila ai ia ka jingkular.
“Ki Rangbah Shnong kila pynthikna bad ngi ngin sa pynkhreh ia ki jingdonkam baroh na ka bynta ka jaka” ula ong.
