Shillong, Nohprah 05 : U Symbud Myntri Rangbah ki kam pynroi sor Bah Sniawbhalang Dhar ha ka sngi Palei, ula kular ia ka kynhun ki Nongshong dukan madan ba ka Sorkar kan pyrshang ban pynkynriah ia ki sha ka jaka kaba paka ba kin lah ban die ia ki mar ki mata.
Haba iakren bad ki nongthoh khubor hadien ka jingialang, u Bah Sniawbha ula ong ba ka kynhun kala kyrpad ban pynioh ia ki ia ka jaka kaba biang ban die mar.
“Nga la ong ha ki (kynhun) ba kin ym khuslai namar ngan don lang bad ki. Sngewbha iatreilang bad ka Sorkar, ngin pyrshang ban pynkynriah sha ka jaka kaba biang ia ki. Long kiba iai shah bad iadonlang bad ka Sorkar. Phi lah ban nym ioh thik ia kaei kaba phi kwah, ngi ruh ngi lah ban nym ioh thik ia kaei kaba ngi kwah hynrei ngi hap ban pyrkhat ban pynioh ia ka jaka kaba biang. Nga la kyrpad ia ki ba kin iatreilang bad ka Sorkar bad kila kmen bha” ula ong.
“Nga kren hok ba ki dei ki hynmen bad para jong ngi hi. Ngim lah ban shu bret kumto ia ki. Ngi shim ia ka rai lang bad ki. Ia mynta, ngi la ithuh ia katto katto ki jaka, ngin sa iarai ha ka jingialang bad ki Ophisar lem bad ma ki” ong u bah Dhar.
U DyCM ula pyntip ba ka Sorkar kan sa iarap pynioh jaka nyngkong eh ia palat 600 ngut ki nongshong dukan madan.
Kat kum ka jingong jong u, kam shym la don satia ka khep ba ki nongshong dukan madan kila kyntait ia ki 3-4 tylli ki jaka bala dep ithuh ban pynlong kum ka jaka shong dukan madan.
