Shillong, Rymphang 18 : U President ka National People’s Party (NPP) Meghalaya bad Symbud Myntri Rangbah Bah Prestone Tynsong ula kular ban pynioh ia ki surok ba bha sha kylleng ki shnong kiba hap hapoh ka Sohra Constituency ban kyntiew ia ki kam jngohkai, ki ban long ki jingkyrkhu ba khraw ia ki paidbah ka thain.
Haba kren ha ka rynsan ialap elekshon ban pan jingkyrshan ia u MDC barim bad kyrtong ka NPP Bah Donevan Wanlang ha shnong Khrang, Sohra hynne ka sngi Ba-ar, u Bah Prestone ula ong “Nga kyrpad ia ki paidbah ka constituency ba kin ieng tylli kawei ha kaban vote ia u Bah Wanlang khnang ba un nang lah pynkhlain ia u MLA ba mynta Bah Gavin M Mylliem, un nang pynkhlain ia nga kum u Symbud Myntri Rangbah bad ruh un nang pynkhlain ia u Myntri Rangbah ban wanrah shibun ki kam pynroi ha ka thain”.
“Ngi kular ban gin sa shna ia ki surok ba paka ha kiba bhun ki shnong, ki bym pat don ia ki surok kiba bha. Kumta, lada phi pynjop ia u (Donevan), kan kham suk ia nga ban treikam” ula bynrap.
Haba pyntip ruh ba ka Sorkar kan sa sdang pyntrei noh shen ia ka Jingkieng halor ka wah ba pyniasoh ia ka shnong Kongthong bad ka Khadarshnong bad Wahkhen, u Bah Prestone ula ong “Ngi la dep ban mang ia ka pisa bad ka jingpyn trei kan sa sdang noh shen bad hadien ba kala dep, ki nongshangkai ki lah ban iaid sha Wahkhen”.
Ula ban jur ia ka jingdonkam ba ki kali ki dei ban lah iaid na Swer sha Wahkhen sha Pomlum bad Khadarshnong bad ong “Nga la kyntu ia u Sordar Shnong ka Raid Wahkhen bad Khadarshnong ba kin wad jaka ban pyntrei ia ka project”.
“Kumta, ka long kaba kongsan ban jied ia u MDC bad MLA na kajuh ka party khnang ba kin lah ban iatreilang bad ka Sorkar na ka bynta ka roi ka par jong ka constituency” ong u Bah Prestone haba kyntu ia ki paidbah ba kim dei ban ngop ha ki jingkynnoh ba ialam bakla ba ka NPP ka dei ka party Garo.
“Ha ka jingshisha, kam dei ka party Garo. Nga dei u President ha Jylla bad u Conrad K Sangma u dei u Myntri Rangbah bad u National President. Sngewbha wat ju ngeit ia kum kine ki jingkynnoh” ula ong.
Haba kren ha ka jingialang, u Bah Donevan ula ong ba ula long teng u MDC na ka congress ha u snem 2014 haduh 2019 bad ha u 2018 ula shah rem ha ka elekshon MLA pyrshah ia u MLA ba mynta Bah GavinM Mylliem. “Hynrei hadien ba iohi ba u MLA ula trei shitom na ka bynta ka roi ka par jong ka constituency, nga la rai ban iehnohkam na ka congress bad kyrshan ia u ha u 2023”.
Haba kyntu ia ki paidbah ba kin kyrshan ia u ha kane ka elekshon KHADC ban wan, une u MDC barim ula ong “Hadien ka jingpynliem ia u MDC ba mynta ka Sohra Bah Titosstarwell Chune jong ka UDP da 1500 vote ha u 2014 kum u MDC, nga la mad ia shibun ki jingeh namar ba kam don ka jingiasngewthuh jingmut hapdeng jong nga bad u MLA barim ka Sohra”.
“Nga dei u EM ba khmih ia ka Land bad ha u 2016 namar ka jingbym don ia u pud u sam ba thikna, nga la pynmih ia ka hukum kat kum ka rule jong ka council ban ai register jaka ei ia ki paidbah kiba dei na ki shnong khappud. Ka jingthmu ka long ba lada ki briew ki don ki kot ki sla, kan kham suk ia ka Meghalaya ban pynkhlain ia ka jingkam trai halor ki jaka ba iakajia pud bad ka Assam”.
 Meghalaya bad Symbud Myntri Rangbah Bah Prestone Tynsong ula kular ban pynioh ia ki surok ba bha sha kylleng ki shnong kiba hap hapoh ka Sohra Constituency ban kyntiew ia ki kam jngohkai, ki ban long ki jingkyrkhu ba khraw ia ki paidbah ka thain.){kind=link}