Shillong, Lber 14: U Myntri Rangbah ka Jylla Conrad K Sangma ula kular ban leh da kaba tyngeh pyrshah ia ka jingmaramot torti ia ka surok NH-6 lada don ba ai ka jingujor da ka jingthoh.
“Lada don kano kano ka jingsngewkhia bad jingujor kiba wan poi sha ka jingtip jong ngi da ka jingthoh, ngi khlem pep ngin leh eiei beit” ula ong haba iakren bad ki lad pathai khubor.
Kane ka jingkynthoh jong u kala mih hadien ba u MP ka Shillong Ricky AJ Syngkon jong ka Voice of the People Party (VPP) ula dawa ban leh ia ka Independent Quality audit ia ka jingmaramot ia ka surok NH-6.
U Bah Ricky ha ka shithi sha u Myntri ka Road Transport and Highway Niton Gadkari, ula pynpaw ia shibun ki jingduna ha ka jingmaramot ia ka surok. Ula pynpaw ba ka surok NH-6 ka dei ka lynti iaid kaba kongsan bha ia ka khaii ka pateng, ki kam jngohkai ha ka thain Shatei Lam Mihngi bad pynpaw ia ka jingkhuslai halor ka jinglong jingman ba nangsniew.
Ula kdew ruh ba ha ka jingleit jurip ia ka shnong Kuliang ha East Jaintia Hills, ka jingsiang surok thymmai la shem ba la leh torti bha ia kaba ka rong lah ban shu khlong da ka kti.
Halor kane ka jingsngewkhia, u Conrad ula kubur ia ki jingeh ban peitngor ia kiba bun ki project hapoh ka Jylla bad ban jur ia ka jingdonkam ban iapeitngor lem da ki paidbah.
“Ki don da ki hajar tylli ki project kiba dang iaid ha kylleng ka Jylla bala pyntrei da ka Sorkar Pdeng bad Sorkar Jylla. Hateng hateng ngim lah ban peit lut ia man ki jingpyntrei, kumta ka jingkyrshan ki paidbah ka long kaba donkam. Ka long kaba donkam ba kum ka Sorkar, ngi leh eiei haba ngi ioh pdiang ia ki jingujor. Nga kular ia ki paidbah ba haba ngi lap ia kano kano ka jingduna ne jinglehtam, kam pher mano ba donkti, bad haba ngi ioh pdiang ia ka jingujor da ka jingthoh, nga dalade ngan pynthikna ba ka Tnad bad ka Sorkar kin leh eiei” ong u Myntri Rangbah.
