Shillong, Nailar 23: U Myntri Rangbah ka Jylla Conrad Kongkal Sangma hynne ka sngi ba-ar ula kular ban sa iakren bad u Myntri Rangbah ka Assam halor ka jingdawa ban pynthikna ba ki lai tylli ki Shnong kiba dei jong ka Nongbah Aking bad Hima Nonglang, kin wan phai biang sha Jylla Meghalaya.
Met the NGOs to have a detailed discussion regarding the areas of differences in Phase 1 of our Border Talks with Assam also touching upon the villages not included in Meghalaya. We have presented them with facts, listened to their concerns & we will try our best to address them. pic.twitter.com/h39CR1FGvW
— Conrad Sangma (@SangmaConrad) August 23, 2022
U Myntri Rangbah ula kular ia kane hakhmat ki Nongialam Sengbhalang ba kynthup ia ka Federation of Khasi Jaintia and Garo People (FKJGP), Association for Democracy and Empowerment (ADE), Khasi Students’ Union (KSU) bad kiwei kiwei, ha ka jingiakynduh hynne ka sngi ha Secretariat.
Kane kala jia ruh hadien shisngi ba ki Sengbhalang na Ri-lum Garo kila wan pynlong ia ka jingiakhih ha Nongbah ban dawa ia ka Sorkar ba kan shong bishar biang ia ka MoU bala iasoi bad ka Assam ha ak 29 tarik Lber, ban pynkut noh ia ka jingiakajia ha ki hynriew tylli ki jaka ba iakynad pud.
Ha ka dorkhas bala iasoi lang kaba la phah sha u Myntri Rangbah, ki Sengbhalang kila kynnoh baka MoU kam shym la pyn shong nongrim kat kum ka histori jong ka jaka ba ki shnong jong ka Mallang Hahuapara, Mallang Joypur bad Mallang Salbari ki dei jong ka Nongbak Aking bad ka Hima Nonglang, bad kiwei pat ki shnong kum ka Maikuli, Iongkuli, Pillangkatta ki dei kiba hap hapoh ka Raid Marwet.
Kane ka jingiakhih kala wan jia ruh hadien shisngi ba ki Myntri Rangbah ka Jylla bad jong ka Assam kila sdang biang ia ka wat ba-ar ban iakren pynbeit noh ia ka jingiakajia sa ha ki hynriew tylli ki jaka ba dang sah ba kynthup ia ka Langpih, Block-I bad Block II. Kine ki artylli ki Jylla kila rai ban thaw ia ki Regional Committee hapoh ka 15 sngi ban pyntyllun shakhmat ia ka jingiakren.
Hadien ka jingialang, u Conrad ula pyntip sha ki lad pathai khubor ba ka Sorkar Jylla kam lah shuh ban pynkylla ia ka MoU bala iasoi bad ka sorkar Assam.
“Hynrei, katba ngi dang jam shakhmat ha ka jingiakren ia ka wat kaba ar, ngin pyrshang ban iakren bad u CM ka Assam bad ngin sa peit kumno ka iaid ka kam…kine ki dei tang khyndiat ki shnong kiba don ha khappud, la kumno kumno ruh tang 10-15 meter na u lain ba tyrwa. Ngin sa peit kumno ka iaid ka kam hynrei ngam lah satia ban kular eiei bad ngin peit ia ka jingiaid ka jingiakren” ula kular.
U Myntri Rangbah ula pyntip ruh ba ha kane ka jingialang, ki Sengbhalang kila kdew ia ki histori jong ki jaka bad ia ka kaiphod u snem 2011 bad dei halor kine ki nongrim ba ka jingiakren kala iaid shakhmat.
“Ngi la pyni ha ki kumno kine ki Shnong ba kila kdew, kila don ha ka map 2011 bala pyni da ka Assam. Namar kata, ka long kaba eh ia ngi ban pynkylla ia katei ka map bad ka kaiphod kaba la aiti da ka Sorkar Meghalaya ha u snem 2011 kaba kynthup ia kine ki Shnong ba kila kdew. Namar kata, ka dei ka jingtynjuh kaba khraw bad ngi hap ban jam shakhmat bad katei ka kaiphod u snem 2011 ia kaba kila sngewthuh mynta” ong u Conrad.
U Myntri Rangbah ula bteng “Hooid ka jingsngewkhia ka dang don namar ki ong ba ki paidbah ki dang kwah ban don sha ka Meghalaya bad ki kwah ban iohi ba la kumno kumno ruh katto katne ki jaka kin wan phai noh. Ngim pat lah ban ong eiei ia mynta hynrei ngin sa peit kumno ka jingiakren jong ka wat kaba ark a iaid”.
“Ngi la dep pynshai sha ki ia baroh ki jingtip ba bniah bad kila sngewthuh ia ka jingtynjuh kaba don bad nga tharai kila sngewthuh ruh ba kumno kane ka kam kala iaid bad kumno ngi la poi sha kane ka jingshim rai” ula bynrap.
U Myntri Rangbah ula kular ba ka Sorkar kan pyrshang kat kaba lah ban leh eiei halor ki jingsngew jong ki Sengbhalang.
Hadien kane, u President ka FKJGP Garo Hills Zone Pritam Arengh Marak ula ong ba ka Sorkar kala kdew ia ki jingeh kiba jwat halor kane ka kam.
“Hynrei ngi la kdew ia ki jingdawa jong ngi hakhmat u CM ba katto katne ki jaka kiba la kdew ha ka dorkhas ki dei ban hap iakren biang namar shuwa ban iasoi ia ka MoU bad ka Sorkar Assam, kine ki jaka ki dei jong ka Nongbak Aking bad ka Hima Nonglang” ula ong.
Ula ong ba kine ki lai tylli ki Shnong kim don satia ha ka jingiakajia pud bad ka Assam ruh kam ju kam trai satia naba ki dei kiba hap ha Meghalaya.
“U Myntri Rangbah ula kular ha ngi ba un sa khmih ia kane ka kam bad un sa peit ia kaei kaba lah ban leh. Hynrei, ngin dang iai buddien ia ka jingdawa jongngi ba kine ki jaka ki dei ban don beit sha Meghalaya” ula ong.
Haba kylli,u Pritam ula ong ba u Myntri Rangbah ula ieng skhem ha ka nongrim ba ka sorkar kam lah shuh ban shong bishar biang ia ka MoU hynrei kan pyrshang pat ban pynbeit ia ki katto katne ki jingbakla kum ka jingpynhap ia ki lai tylli ki Shnong sha Assam.
Ula maham ruh da kaba ong “Lada ngi sngew baka Sorkar Jylla kam shym la pyrshang katba lah, ngi lah ban pynsdang biang ia ki jingiakhih ba laiphew jait”
Haba pynsngew ia kajuh ka sur, u President ka FKJGP Sengkmie Bah Dundee C Khongsit ula ong ba ka kynhun ki Seng bhalang kila dawa ia ka Sorkar Meghalaya ban shim kabu ia ka jingiakren iasuk jong ka wat kaba ar da kaba iakren bad ka Sorakr Assam ban pynioh pat ia kine ki jaka jong ki paid riewlum ka Jylla.
“Kam shong eh ha ka jingbishar biang ia ka MoU hynrei ha ka jingiakren bad ka Sorkar Assam hynrei haduh mynta hi, ka nongrim jongngi ka dang long kajuh ba ngi dawa ia ka Sorkar Jylla ban wad ia ki lad ki lynti kumno ban pynioh pat ia baroh ki jaka jong ngi” ula ong.
