Shillong, Jymmang 01 : Ka Defence State Office, Guwahati, kala kular ban aiti ia ka survey report ba bniah bha halor ka jaka ha Lum Survey, Shillong, hadien ka jingmih pyrthei ka jingiabuhai shnong beain da ki briew bad ka jingujor ba mih ki kam bymman na kane ka jaka.
Kane ka jingkular kala mih na u Nongmihkhmat ka Defence State Office ha ka jingialang bala khot pynlong da u Deputy Commissioner ka East Khasi Hills District, SC Sadhu hynne ka sngi Balang.
Haba iakren bad ki nongthoh khubor, u Sadhu ula ong ba u Nongmihkhmat na ka Defence State Office, Guwahati ula wan iashimbynta ha ka jingialang ban ai ia ki jingtip ia baroh ki kam bad ki sienjam ba ka Ophis kala shim haba iadei bad ka jaka ha Lum Survey.
“Ki (Defence) la kular ban sa ai ia ki jingtip ( halor ka histori jong kane ka jaka bad ki kam b aka Ophis kala leh). Ngi ruh ngin sa pule ia ka hukum ban iarap ia ngi ha kaban rai ia kaei kaba dei ban leh hadien habud” ula ong.
Halor ka mukotduma ba dang sah ha Iingkashari, u DC ula pyntip “ Haka jingshisha, kala don ka jingiakhun mukotduma halor kane jaka bad ka Iingkashari kala pynksan ia ka hok longtrai sha ka Defence State Office”. Hynrei ula ong ba ki bor khmih ka Tnad Defence kila ai ia ka notice ban kyndang ia ki iing beain hynrei katto katne ki briew na kane ka jaka, kila leit sha IIngkashari kaba la pynsangeh da kaba ong ba ka jingkyndang ia kine ki iing beain ka dei ban iaid kat kum ka ain.
Ula iathuh ba ka sien shong bishar ba khatduh ka dei kaba la pynlong ha u bnai Nohprah 2023 bad ka Iingkashari kala buh ia ka 27 tarik Jymmang kum ka sngi ban shong bishar biang ia kane ka kam.
Haba kylli, u DC ula ong “Ia mynta hi kam pat shym don ka jingleh survey namar ka kam ka dang don ha Iingkashari. Hynrei kumba nga ong, ka Defence State Office kan sa phah ia ka kaiphod ba bniah namar kila dep ban leh ia ka survey”.
Nalor kane, u Sadhu ula iathuh ba ki bor Disrtrict kin sa shim ia ka sienjam ban leh eiei pyrshah ia ki kam bymman ha Lum Survey.
“Ngi la shim ia ka sienjam bad u SP ka East Khasi Hills ban ioh ia ka kaiphod halor ka jinglong jingman ka suk ka sain ha katei ka thain khnang ba ngi lah ban leh eiei kat kum ka lynti kaba dei lada don kano kano ka jingpynmih ia ka huri hura” ula ong.
“Kumba ngi la iakren mynta ka sngi, ngin sa thaw ia ka Joint Committee hapdeng ka Ophis jong ngi, ka Defence State Office, ki Pulit bad ka Municipal Board bad ngin sap hah ia ka kynhun ban leit jurip bad pynshisha. Ngin shim mar mar ia ki sienjam ba donkam khnang ban tehlakam noh ia kine ki kiei kiei baroh. Ngin sa leit jurip hapoh kane hi ka taiew” ula bynrap.
U DC ula ong ruh “Namar ka jingkynnoh kala mih ba kane ka jaka ka dei kaba la pyndonkam kum ka jaka khaii droks, ngi la pan ia ka kaiphod na ki Pulit bad hadien bala pynthikna ia kine ki kam khlem sa peit ia ka hukum ka Iingkashari kaba pynsangeh tang ia ka jingkyndang ia ki Iing, kan ym khang satia ia ngi ban shim ia ki sienjam ha kaban tehlakam ia ka shongsuk shongsain”.
