Shillong, Jymmang 04 : U Myntri sorkar bad Nongaiktien ka Sorkar MDA Bah Paul Lyngdoh hynne ka sngi Palei, ula pyntip ba ka Sorkar Manipur kala kular ia ka jingshngain jong ki nong Meghalaya kiba sah ha Jylla Manipur.
“Namar ka jingiakajia jaidbynriew kaba la rhem mynta ka Manipur, u Myntri Rangbah ka Jylla Conrad K Sangma, ula kren mynta ka sngi ia u Myntri Rangbah ka Jylla uba la ai ia ka jingkular ba ka jingshngain jong ki nong Meghalaya kan dei ka kam ba hakhmat eh bad ba ymdei ban khuslai haba iadei bad ki samla pule ne kiba trei ba ktah kiba dei na Meghalaya” ong u Bah Paul.
Haba kylli, u Bah Paul ula ong “Ngi kyrmen ba kane ka jingjia kan nym poi sha uta u pud, hooid ka jingshngain jong ki nongshongshnong jong ngi ka dei kaba hakhmat eh hynrei ngi kyrmen ba ka jingiakynad kan nym poi sha u pud kaba kin hap ban mih bad leit phai”.
