Shillong, Risaw 12: Ka sorkar jylla lane ka tnat ka koit ka khiah kala kular ban ai ka jingiada iala ki nongtrei 108 katkum ki kyndon ka ain, lada wan shimti ka Company thymmai ban pyniaid iaki kali kit nongpang 108 hadien bala pyndep iaka jingkhot Tender.
Ia kane la pyntip ka Myntri ka tnat ka koit ka khiah kong Ampareen Lyngdoh haba jubab halor ka jingkylli, lano ka Company thymmai kan wan shimti ban pyniaid iaki kali kit nongpang 108 hapoh Meghalaya.
Haba kren sha ki lad pathai khubor ka kong Ampareen kala iathuh ba kala dep ban iakren bad u Managing Director ka tnat National Health Mission (NHM) uba la pyntip ba ka Tnad kala dep ban khot Tender iaki Company kiba kwah ban shimti ban pyniaid iaki kali kit nongpang 108 hapoh Meghalaya.
Ka kong Ampareen ka iathuh ba ha kane ka Tender thymmai ka tnat ka koit ka khiah kala bsuh ruh iaki kyndon naka bynta ban wanrah ka jingkylla haba iadei bad ka rukom shakri iaki nongpang bad haka juh ka por ban iada iaki nongtrei 108 kiba la shakri da ki phew snem ha kane ka kam.
“Haka jingialang bad u MD ka NHM, la sngewthuh ba yn pyndep iaka jingkhot Tender hapoh 2 lane 2 bnai shiteng bad ka sorkar kan nym tuklar eiei haba iadei bad ka jingthep Tender naka bynta ban pynthikna ba ka Company kaba biang tam kan ioh ban pyniaid iaki kali kit nongpang 108 naka bynta ka bha ka miat ki paidbah jong ka jylla” ong ka kong Ampareen.
Ka kong Ampareen kala iathuh baka sorkar kala bthah iaka NHM ban pynthikna ba ka Company ne ki briew ki ban shimti ban pyniaid iaki kali kit nongpang kidei kiba la biang bha ban pynthikna ba ka 108 kan treikam bha ban shakri iaka bha ka miat u paidbah ka jylla.
“Ka long kaba shisha ba ki nongtrei 108 kila kynduh ia nga bad kila pynpaw ka jingsngewdiaw iaka lawei jong ki lada wan shimti da ka Company thymmai hynrei nga la kular ha ki ba ka Sorkar kan btin lynti bad kan iada iaki katkum ki kyndon ka ain khnang ba kin dang lah ban shakri khambha iaki paidbah ka jylla” kala ong.
