Kular ka MPSCB ban hiar jurip ia ka jaka ba thmu seng karkhana Coke ha Wapungskur

Maham ia u Dolloi ka Jowai bad RS ka Mookhep ban shim jingkitkhlieh lada jia eiei

Shillong, Iaiong 03 : Ka Meghalaya State Pollution Control Board (MSPCB) kala kular ban pynlong ia ka jingjurip ia ka jaka ha Thlakaru, Wapungskur, East Jaintia Hills hadien ka jingujor jong ka Dorbar Shnong Wapungskur pyrshah ia ka jingthmu ban seng ia ka karkhana Coke ha ka jaka khlaw kaba hap hapoh u pud u sam jong ka Shnong.

Ia kane ka jingkular la ai da u Member Secretary ka MSPCB Bah CH Chyrmang sha ki Nongialam ka Wapungskur Dorbar Shnong bala ialam da u Rangbah Shnong Bah Postling Dkhar, ha ka jingialang ba long hynne ka sngi Palei.

“Ngi la pynpaw ia ka jingpyrshah kaba jur pyrshah ia ka jingthmu ban wan seng ia ka karkhana coke bad ka MSPCB kala kular ban hiar jurip ia ka jaka hashuwa ba kan shim rai la kan pynduh pyndam noh ne em iaka CoE (Consent of Establishment). Kin sab uh ia ka tarik bad sa pyntip sha ngi ha ki sngi ban wan” ong u Bah Dhar haba iakren bad ki nongthoh khubor hadien ka jingialang.

“Haba kylli la ki tip ne em ba ka dei ka jaka khlaw, ki Heh ka MSPCB kila kam ba kila ioh ia ka jingbit na u District Forest Officer (DFO) ba kam dei satia ka jaka khlaw. Kane ka jubab kala pynkyndit ia ngi namar jin ba kila wan ban jurip dalade, kin sa shem ia ka Reserve Forest jong ka Dorbar Shnong” ula ong.

U Bah Dkhar ula ong ruh ba ka Sorkar Shnong ka iengskhem ba kan nym ailad ia kiwei ba kin tuklar ia ki kam hapoh u pud u sam ka shnong bad ong ‘Wat lada ngi duk, ngi kwah ia ka mariang kaba koit ka khiah ia ki briew jong ngi. Ngim donkam ia ka pisa namar ngim kwah ban iapein ia ka koit ka khiah bad ka bha ka miat ki briew jong ngi. Ngi iatip lut ba ka jingwan kine ki karkhana coke kin shu pynjakhlia tang ia ka mariang. Kumta, ngin iai bteng ban iada bad tyngkai ia ka Reserve Forest jong ka Shnong”.

“Ngim ym shah ban seng ia kano kano ka karkhana coke. Lada ki nud ban leh da ka bor, u Dolloi ka Jowai bad u Rangbah Shnong ka Mookhep ki dei ban long kiba la khreh ban tynrong ia ki jingbahkhlieh ia kaei kaban jia” ula maham.

Nalor kane, u Rangbah Shnong ka Wapungskur ula ong ther tyngeh ruh ia u Dolloi ka Jowai Elaka namar ka jingbym lah ban pyntip ia ka Dorbar Shnong halor ka rai jong u ban ai NOC ha kaban buh ia ka karkhana coke.

“U (Dolloi) la dei ban pyntip sha ngi ia kum kane ka rai. Ngi dei shibynta jong ka Jowai Elaka bad ngi don ia ka hok ban tip. Lada um kwah shuh ia ngi ban dei shibynta jong ka Elaka, ngi kmen eh ban mih noh. Nalor kane, lada u sngew donkam ia ka karkhana coke, ai ba un seng hala ka jong ka kyrpong lane ha Jowai” ula ong.

“Namar kata, ngin sa iakynduh ia u Dolloi ka Jowai lashai ka sngi ban dawa ba u dei ban pynduh noh ia ka NoC hapoh ka laisngi. Ha kajuh ka por, ngi dawa ia u Rangbah Shnong ka Mookhep ban pynduh noh ia ka NoC b aula ai namar u dei ban pyrkhat lem ia ki briew jong ka thain” ong u Bah Dkhar haba bynrap “Lada ki lah ban pynneh ia ka jingpynmih tem ki karkhana coke tang hala u jong u pud te ka biang hynrei lad aka ktah lem ia ngi, ngin ym ailad satia. Kumta, ngin iai bteng ban pyrshah”.

U Bah Dkhar ula kdew ruh ba ka jingai ia ka CoE ka dei kaba la leh khlem da pynlong ia kano kano ka public hearing bad ong “Ngi phah ia ka khubor kaba shai ban gin ym ailad ban seng ia kano kano ka karkhana coke hapoh u pud u sam jong ngi”.

Kat kum ka jingong jong u, ka Dorbar Shnong Wapungskur kala kyntait ia bun tylli ki jingkyrpad ban ai NoC ha kaban seng ia ka karkhana coke hapoh u pud u sam ka Shnong.

Ula ban jur ruh ia ka jingdonkam ban pynlong ia ka jingwad bniah kaba sani bha halor ka karkhana coke kaba don ha Mookhep bad kynnoh ba dei ka daw jong ka jingiap khlem dei por jong ki Khynnah hapoh ka thain.

Ha kajuh ka por, u Member Secretary ka MSPCB ula ong ba ka Board kala ai ia ka CoE haba pynshong nongrim na ka NoC bala ai da ka Dorbar Shnong ka Mookhep.