Shillong, Nailur 06 : U Myntri Sorkar bad MLA ka BJP na Pynthorumkhrah Bah A.L.Hek, ula kubur ba ka don ka jingshisha ba u President ka Bharatiya Janata Party (BJP)-Meghalaya Bah Ernest Mawrie ula treikam da kaba pynhun tang iala ki jong ki bahaiing hasem ne paralok (nepotism) bad dei ka daw bah ba ym kiew ka party ha Jylla Meghalaya.
Une u Nongialam ka BJP ula kubur ia kane halor ka jingkynthoh jong Nongialam ka BJP bad MLA barim ka Mawsynram bah Himalaya M Shangpliang ba ula shim ia ka sienjam ban iehnohkam na ka BJP namar ka jingtreikam pynhun bahaiing ne tang ki paralok da ki Nongialam ka party hapoh ka jingialam u President Bah Ernest Mawrie.
U Bah Himalaya Shangpliang ula aiti ia ka shithi iehnohkam hynne ka sngi Balang sha u President ka Party ka Jylla.
Haba iakren bad ki Nongthoh khubor, u Bah Hek ula ong “Ka jingkren jong u Bah Shangpliang kam dei tang ka jingkren jong u, lada phi kylli na baroh ki Nongialam jong ka BJP hapoh Meghalaya naduh Garo Hills, Ri-Bhoi, West Khasi Hills, Shillong, kan don kajuh ka kyntien hi ba ka jingeh ka dei tang naka daw jong u President…ta ka daw ka party kam lah ban kiew bad pynkhlain ha Jylla Meghalaya”.
U Bah Hek u pyntip ba u Bah Himalaya ula wan iakynduh ia u (Hek) hynnin ka sngi bad iathuh ia ka sienjam ban iehnohkam noh na ka BJP da kaba aidaw ba ym lah shuh ban iatreilang bad u Bah Ernest Mawrie kum u President.
Haba kylli halor ki sienjam ban weng noh ia u bah Ernest kum u President, u Bah Hek ula ong “Ka por kala kut hi ia u ban bteng kum u President ka Meghalaya BJP”.
Halor ka jingioh bteng, une u Nongialam ula ong “Ka daw hi ka dei ba ki dang don ki Jylla ba don hapdeng ka elekshon, ta ka daw ka Party kam pat ioh ia ka por ban shim ia kano kano ka rai”.
Namar ka jingbym lah lehbha jong ka BJP ha ka elekshon ha Jylla, u Bah Hek ula ong “U President bad baroh kila iatrei shitom hi hynrei dei ba ki paidbah ka Jylla kim pat pdiang hi ia ka BJP”.
