Shillong, Nailar 29 : U Nongialam ka NPP bad Symbud Myntri Rangbah ka Jylla Bah Sniawbhalang Dhar, ha ka sngi Ba-ar ula pyntip ba u MLA barim ka Mawsynram bad Nongialam ka BJP Bah Himalaya Shangpliang, ula pynpaw ia ka jingkwah ban wan pyniasoh noh sha ka National Peoples Party (NPP) hashuwa jong ka elekshon MP-Lok Sabha ban long ha u snem ban wan.
Lah ban kdew hangne ba ka jingiakren kala mih ba u Bah Himalaya M Shangpliang u kwah ban mih aireng kum u kyrtong jong ka NPP ha ka elekshon MP-Lok Sabha na Shillong parliamentary seat.
Hynrei u DyCM ula pyntip ba ka NPP kan dang ban shim rai halor ka jingai ticket na ka Shillong parliamentary seat.
However, the party is yet to decide on the allotment of tickets for the Shillong parliament seat.
Une u Nongialam ka NPP ula pyntip ba ki don haduh 7-8 ngut ki kyrtong kiba kwah ban iakhun ia ka elekshon MP na Shillong n aka ticket ka NPP.
“Namar kane, ka Party kan sa shong jingialang noh shen ban shim rai ia kane ka kam. Kane ka dei ka lynti ba ngi ju iaid bad ngi donkam ban bud ia ka rukom jied ia ki kyrtong. Namar kata, ngin sa shong bishar bad ngin sa jied ia u kyrtong uba biang eh” ula ong.
U Bah Sniawbha ula pyntip ruh ba ka NPP kan sa pyrshang ban shim rai ia ka kyrteng jong u kyrtong ka Shillong parliamentary seat hapoh ka taiew ba khatduh jong u Nailur.
Haba kylli, une u Nongialam ka NPP ula ong ba kam shym la don satia ka jingpyrshang ban iakren bad u MP ba mynta ka Congress Bah Vincent H Pala ban wan rung sha ka party.
“U Bah Pala u dei na ka Congress, balei ba un pan ia ka ticket na ngi?. Kam shym la don satia ka jingpyrshang na ka NPP ban iakren bad u ba un wan pyniasoh bad ngi” ula ong haba bynrap ba ka NPP kala rai ban trei borbah ha kaban pynliem noh ia u Bah Pala.
Ha kajuh ka por, ka NPP kala rai ban pynieng biang ia ka MP ba mynta ka Tura, ka Agatha Sangma ha ka elekshon MP-Lok Sabha na Tura parliamentary seat.
