Shillong, Naitung 20 : Haba kubur ba ka jingrung kyrthep ki bar jylla ka dei ka jingma, u Myntri Rangbah ka Jylla Conrad K Sangma ha ka sngi Palei ula kular ba ka Sorkar Jylla kan sa leh eiei halor ki jingsngewkhia ki paidbah baroh hashuwa ban shim ia ka rai ban pyniaid shakhmat ia ka railway project ha Ri-lum Khasi bad Jaintia.
U Conrad haba iakren bad ki nongthoh khubor ula ong ba lada ka don ka jingsngew na ki paidbah ba donkam ban pynlong ia ka jingwad bniah halor ka jingktah ka jingrung kyrthep ki bar jylla hapoh ka Jylla, ka Sorkar kam don jingeh satia ban pynlong ia kum kane ka jingwad bniah.
“Ka jingwad bniah kam dei satia ka kam kaba heh hynrei ka jingrung kyrthep ki mynder ka dei. Nga la kren shai sah ki paidbah ba ka Sorkar kan nym shu leh da kaba bor hakaban wanrah ia kum kane ka project lada ki paidbah ki don ka jingsngewkhia ia ka. Ngin hap ban leh eiei ia kine ki jingsngewkhia shuwa ba ngim jam shakhmat” ula ong.
Kane ka jingkren jong u kala mih kum ka jingkynthoh ia ka jingai jingmut jong ka Congress kaba don ha ka Liang Pyrshah, ban pynlong ia ka jingwad bniah halor ka jingktah ka jingrung kyrthep ki mynder sha Meghalaya hadien ka jingieng pyrshah na ki kynhun bapher bapher halor ka jingthmu jong ka Sorkar ban wanrah lynti rel ha East Jaintia Hills District.
U Conrad ula pyntip ba ka Sorkar Jylla kala kren da kaba shai kdar ia ka nongrim ba ka ieng halor ka lynti rel sah u Myntri ka Ministry of Railway ka Sorkar Pdeng.
“Ha ka jingialang bad u (Myntri Railway), nga la iathuh b aka don ka jingsngewkhia jong ki paidbah bad khlem da pynbeit shuwa ia kine ki jingsngewkhia, kam long satia kaba dei ia ngi ban shu leh da ka bor” ula ong.
U Conrad ula pyntip ruh ba u Myntri ka Railway ula pynpaw ruh ba ka don ka song pisa ka ban ai sha ka Jylla na ka bynta ban thied jaka bad kiwei kiwei ki jingdonkam kum shibynta jong ka project.
“Hynrei nga la kren shai ha u ba lada dei ban ai jingbthah bad lada kala don kano kano ka jingwad bniah, ia ka lynti rel lah ban buh ha kiwei pat ki bynta jong ka Jylla bad ka Sorkar India ka kwah ba ia kane ka pisa yn pyndonkam ha kaban pyniasoh lynti rel ha ki jaka kiba iahap, ka ban ai jingmyntoi ia ki paidbah bad kaba ki paidbah ruh ki kmen ban ioh lynti rel” ula ong haba bynrap “U Myntri ula kmen palat ban iohsngew ia kane bad pynpaw ba u kloi ban pdiang ia ka jingpyn kynriah noh ia ka railway project na Byrnihat-Shillong bad ia ka pisa bala mang sha kiwei pat ki jaka jong ka Jylla. Ta ka daw ngin sa iasyllok bad kiwei ki jaka jong ka Jylla bad ban peit la ka biang ne em ban pynkynriah ia kane ka project sha kiwei pat ki bynta jong ka Jylla”.
Pule ruh: Phah tuklar ka KSU ha u CM halor ka jingioh bun ki bar Jylla ha ka jingthungkam ka Post Office
