Shillong, Risaw 31: U President ka United Democratic Party (UDP) bah Metbah Lyngdoh ula ong ba ka party ka iatylli hynrei ki don pat ki jingiasngew pher jingmut hapdeng ki katto katne ngut ki nongialam ka UDP.
Kane ka jingkam u president ka UDP ka wan hadien ba Adviser ka party bah Bindo Lanong ula kynnoh ba ka party kala kyntait ban ai ticket ia u hynrei kala pdiang bad ai ticket ia u nongwei u bym pat ju don bynta bad ka party.
Haba kren sha ki lad pathai khubor u bah Metbah ula ong ba party kala peit thuh iaki jingkren, ki jingkynthoh bad ki jingkynnoh bala mih na uwei rangbah ka UDP bad shen ka party kan sa shim iane ka rai haka jingialang jong ka party.
“Ka party ka long kawei, kam don ka jingiapait iapra hapoh ka UDP hynrei ka don ka jingiasngew jingmut hapdeng iwei arngut ki nongkitkam bad ki dkhot ba party bad ia kine baroh yn sa iathir hapoh ka jingialang jong ka party ban tip iaka tynrai bad ban shim ruh iaki sienjam ba dei ban shim” la ong u bah Metbah.
U bah Metbah ula ong ruh ba haduh mynta ka UDP kam pat shim iaka rai ba khatduh ban pynbna kyrtong na Nongkrem konstitwensi namar ki kam ki dang iaid bad shen ka party kan sa pynbna paidbah, mano ba ioh Ticket naka UDP ban iakhun iaka ielskhon 2023.
Haba iadei bad ki khubor ba kyntait iakhun ilekshon u MLA ka Mawphlang u bah Eugeneson Lyngdoh, naka liang u president ka UDP u bah Metbah Lyngdoh ula ong ba ka party kala phah tuklar ia kane ka phang shaka District Level bad ia kane ruh shen ka party kan sa shim iaka rai ba khatduh.
Nalor kane u bah Metbah ula iathuh ba haduh mynta ka UDP kala dep ban ithuh haduh 40 tylli ki konstitwensi ban pynieng kyrtong naka bynta ka ilekshon 2023 bad haduh mynta ka party ka dang eksamin bad bishar ia ki kyrtong ban pynieng haka ilekshon 2023.
