Shillong, Iaiong 27: Ka District Medical & Health Officer of East Khasi Hills Dr A Lyngdoh hynne ka sngi Palei, kala kubur ba ka don ka jingduna jong ki dawai dashin ia mynta namar ba ka don ka jingpynkylla ha ka rukom thied ia ki dawai ha ka jylla.
Ia katei la pynpaw halor ki sienjam kiba la shim ha kaba iadei bad ka jingai jingsumar ia kiba ioh iaka jingpang shit met na ka daw ka jingpang Typhoid ha ka Shella PHC bad Ichamati CHC ha ka shithi kaba la phah sha u General Secretary ka HYC u Bah Roykupar Synrem.
Ka HYC kala phah da ka jingthoh sha ka DM&HO ba kyrpad ban pynbiang ia ki dawai dashin ha kitei ki ar tylli ki jaka ai jingsumar ban sumar iaka jingpang Typhoid bad kumjuh ruh ban pynlong ia ka jingtohkit halor ka jingioh ki paidbah ia katei ka jingpang.
“Ka don ka jingduna jong ki dawai dashin ia mynta namar ba ka don ka jingpynkylla ha ka rukom shalan ia ki dawai sha ka jylla lyngba ka Meghalayan Medical Drugs & Services Limited (MMDSL). Ngi la phah ia ka jingthoh sha ka ophis u DHS (MI)/MMDSL ia ka thup kyrteng jong ki dawai kiba donkam ban iakhun ia katei ka jingpang” la pynpaw ka Dr Lyngdoh ha ka shithi kaba la phah sha ka HYC.
Kala pyntip ruh ba ka kynhun jongka IDSP Cell kan leit ban hiar jurip ia ka thain Shella ha ka 28 tarik u Iaiong ban pynlong iaka jingtohkit bniah halor katei ka jingjia bad ban wad bniah ban lap ia ka daw tynrai jong ka tyllong kaba katei ka jingpang kala mih.
Ka Dr Lyngdoh kala phah ruh ia ka shithi na ka bynta ban pynlong ia ki Awareness Program ha Shella & Ichamati halor ki dak ki shin, ka daw jong ka jingioh iaka jingpang, ka jingsumar bad ki jingiada na katei ka jingpang.
