Shillong, Nailur 09 : U Symbud Myntri Rangbah ba khmih ia ka District Council Affairs (DCA) Bah Prestone Tynsong ha ka sngi Ba-ar, ula ong ba ka Sorkar kam don satia ia kano kano ka jingmut ban kyntur ne pynkhein ia ki bor jong ki lai tylli ki Autonomous District Council (ADC) lyngba ka jingtyrwa song jingiarap (bailout package) ba kin lah siew tulop ia ki nongtrei.
Kat kum ka jingong jong u, ka rai jong ka Sorkar ban thaw ia ka State Committee bad ki lai tylli ki Sub Committee ka dei da ka jingthmu ban pynthikna ia ka jingdon ka pla tyngka kaba shngain bad ban wanrah ia ki jingpynkylla ia ka rukom treikam ha ki ADC.
Haba jubab ha ka mat iatai ba lyngkot bala wanrah da u MLA ka VPP na Nongkrem, u Bah Prestone ula ong ba ki kyndon treikam jong ki Committee ki kynthup ia ka jingiakren bad ki ADC, pan ia ka jing mynjur jong ki, bad ban iakren ia ki jingpynkylla kum ka policy thungkam, ka policy thied tiar thied tar, ki jingshakri ki nongtrei bad kiwei kiwei.
“Ki kyndon treikam jong kine ki Committee, da lade ki kren ba kam don satia kano kano ka jingmut ba rieh kumba la pynpaw da u MLA ka Nongkrem, uba la kynnoh ba kane ka jingleh ka long eh ban ioh pyniaid ia baroh ki ADC, ka bym shym long kaba shisha” ula ong.
“Nga shimet nga sngew ba kane ka dei ka Sorkar kaba nud ban pynbna lane ban tyrwa ia kane ka song ban weng ia ka jingeh ki ADC hapoh ka jingialam u Myntri Rangbah. Ym pat ju don ki Sorkar kiba leh ia kane haduh mynta. Ka dei tang kane ka Sorkar kaba shimkhia bha halor kane watla, hooid ngi don ia ka jingduna pisa hynrei haba khmih ia ka jinglong jingman ki nongtrei ki ADC, ka Sorkar ka hap ban mih shakhmat ban iarap hynrei kam mut pat ba ngin thom ia ka bor ki ADC. Haba mih shakhmat ban iarap ka mut ba to ngin leit bad iakren, to ngin don ia ka jingiakren haba shai” batai u Symbud Myntri Rangbah.
U Bah Prestone ula kren halor ki jingeh kaba khraw ha ka liang ka pisa tyngka ba la mad da ki ADC, haba kdew ia ki jingduna ka pisa ban pyndap ia ka jingdonkam ban siew tulop ia ki nongtrei.
Kum ka nuksa, ka Jaintia Hills Autonomous District Council (JHADC) ka pynmih ia ka khajna shisnem ba kot T.68.98 klur hynrei ka donkam T.102 klur ban siew tang ia ka tulop, kaba lam sha ka jingduna pisa ba kot T. 33.02 klur.
“Kumjuh ha GHADC, ka jingpynmih khajna ka long T.14.15 klur katba ka jingpynlut tang ia ka tulop ka kot haduh T.84 klur bad ka jingduna pisa ba long T.69 klur. Kane ka jia manla u snem. Kane ka jingeh kam shym la mih ne sdang tang ha u snem 2018-2019, hynrei kala nang kynton. Ha KHADC, ka jingpynmih khajna ka long T.46.11 klur katba ka jingpynlut ha ka tulop ka long T.72 klur, ka jingduna ba kot T.25.9 klur shisnem” ula ong.
“Haba peit ia kane ka jinglong jingman, ka pyni ba ka Sorkar ka hap ban mih shakhmat ban iarap. Ngim ong ba ka Sorkar kan siew ia ka tulop haduh kaba kut hynrei ngi kwah ban don tang kum ka jingiarap song pisa ban iarap weng ia ka jingeh (bailout package). Kane ka dei ka jingthmu jong ka Sorkar” pynshai u Symbud Myntri Rangbah.
U Bah Prestone ula pynbna ia ka jingpynkylla kaba khraw bala wanrah da ka Sorkar, ban buh ia ka Tnad District Council Affairs kum ka Tnad ban iatreilang bad ki ADC. Kane ka sienjam ka thmu ban pynbeit ryntih ia ka jingiakren hapdeng ka Sorkar Jylla bad ki ADC, ban pynduna ia ka jingdonkam ki ADC ba kin leit iakren ia ki tnad bapher bapher halor ki bhah khajna ba ki dei ban ioh.
Halor ki jingeh bala iakynduh da ki MDC na ki constituency ha jaka sor, u bah Prestone ula pynpaw b aka Sorkar kala shim ia ka rai ban iasyllok bad ki MDC halor ki skhim bala tyrwa hapoh ka 15th Finance Commission.
“Ka 15th Finance Committee kala mang ia ka pisa lyngba ka Tnad Urban Affairs kaba dei ban pyntrei da ka Municipal Board. Ka dei ka policy na ka Sorkar India. Hynrei, ngi lah shong jingialaang bad shim ia ka rai ba naba kane ka dei ka kam policy jong ka Sorkar India, ka Municipal Board kan iasyllok bad baroh ki MDC kiba mihkhmat na ki jaka sor ia kino kino ki skhim ba ki tyrwa. Kane ka dei ka rai bala shim ha ka 20 tarik Jymmang, 2025 ha ka jingialang bad ki MDC na ki jaka sor ka JHADC bad KHADC” ong u Bah Prestone.
“Hynrei, nga thikna ba ka 15th Finance Commission kala kut. Ha ka por ba ki wan shane, kila khot ia baroh ki ADC. Ka Sorkar Jylla ruh kala pyntip ia kane ka mat hakhmat ka 16th Finance Commission (ha ka por ba ka wan ha Shillong) ba lada long kaba lah, ba kan wanrah ia kano kano ka lynti ka ba suk namar haduh mynta baroh ki 16th FC kin hap iaid lyngba ka Ministry of Panchayati Raj hynrei hangne ngim don satia ia ka Panchayati Raj” ula ong haba bynrap “Ia kane ka mat la dep pynsngew hakhmat ka 16th FC bad nga thikna ba ngin ioh iaka jubab kaba sngewtynnad n aka 16th FC bad lehse ki lah ban ai jingmut ki ba lah ban weng noh ia kine ki jingeh ba ngi la mad ha kine ki san snem bala leit”.
 Bah Prestone Tynsong ha ka sngi Ba-ar, ula ong ba ka Sorkar kam don satia ia kano kano ka jingmut ban kyntur ne pynkhein ia ki bor jong ki lai tylli ki Autonomous District Council (ADC) lyngba ka jingtyrwa song jingiarap (bailout package) ba kin lah siew tulop ia ki nongtrei.){kind=link}