Shillong, K’lyngkot 03 : Ka Dorbar Shnong ka shnong Mawsynram ha ka sngi Thohdieng kala ieng skhem ha ka nongrim ba kan nym pyndem satia ha kino kino ki bor bad kan iai bteng ban khang pyrshah ia ka jinglehniam hapoh ka krem Mawjymbuin, namar ba ka dei ka jaka jngohkai.
Haba iakren bad ki nongthoh khubor hadien ka jingialang bala pynlong da ka Deputy Commissioner ka East KHasi Hills Kong RM Kurbah, u Assistant Rangbah Shnong bad Nongaiktien ka Dorbar Bah Hiamdor Rapsang ula ong ba ka Dorbar Shnong ka dei ka trai jong ka Krem Mawjymbuin bad naduh kaba sdang ka Dorbar kam ju shah satia ban lehniam shapoh jong ka krem.
“Naduh kaba sdang haduh mynta, ngim ju shah ia kino kino ki kynhun ba kin wan lehniam leh rukom shapoh jong ka krem” ula ong.
Haba pynpaw ba kam don satia ka jingkhang iano iano ruh ban wan kai sha katei ka krem, u Bah Hiamdor ula ong “Hynrei, kino kino ki briew ne ki kynhun ba wan ban wankai sha ka krem ki dei ban burom ia ki kyndon jong ka Dorbar Shnong, kaba ngi la khang tyngeh ban lehniam hapoh ka krem bad ban pynkylla ia ka krem kum ka mandir ne ka temple namar kane ka dei ka dei ka jaka jngohkai. Ngi hap ban burom ia baroh ki nongwankai,kiba wan sha kane ka krem”.
Haba kren ia ki jingjia ha ki snem bala leit noh ha kaba ki briew kila wan ban lehniam jubor shapoh kane ka krem, une u Nongialam Shnong ula ong “Ha ki snem bala leit, kila wan bad theh dud bad thang dhup bad bret syntiew-kaba lam sha ka jingpynjaboh ia ka krem bad ki jaka ba marjan. Kumta, ka Dorbar Shnong kala hap thung ia ki volunteer ban ap bad ban nym shah naar ngi kwah ban tyngkai bad iada iakane ka krem”.
“Lada ki briew ki pynkhein ia ki kyndon, ka Dorbar Shnong kan hap ban leh eiei kat kum ka lynti jong ka ain” ula maham haba pyntip “Kane ka krem ka dei kaba plie ia ki nongwankai naduh ka por 9 baje mynstep haduh ka por 5 baje janmiet manla ka sngi”.
Haba kylli, u Bah Hiamdor ula ong “Kine ki briew ki kwah ia ngi ban ai jingbit ia ki ba kin lehniam leh rukom hynrei ngi la kyntait namar ka krem kam dei ka jaka ban ia mane blei. Ngila kren shai ba ki lah ban wan hynre ki hap ban bud ia ki kyndon jong ka Dorbar Shnong”.
Ula kynthoh ba ka KSP kala shah ialam bala halor kane ka kam ba iadei bad ka krem.
“Hynrei, haba ki (KSP) wan shane mynne kila kubur ruh ia kata. Na kylleng ki jaka ka India, ki briew kila wan sha krem Mawjymbuin, khamtam ha ki taiew ba kyrpang jong ki. Haba ki iohi ia ki signboard ba ngi la buh bad ki kyndon, ki ong ba kila sngewhun tang ba kila ioh ban wankai sha kane ka jaka. Lada ka dei ka temple jong ki, ki lah ban leh kat kaba ki mon hynrei naba ka dei ka jaka jngohkai, kumno ki lah ban pynkylla sha ka temple, khamtam haba ka dei ka nongkynti jong kiwei?” ula buh jingkylli haba pynpaw ia ka nongrim kaba skhem ba ka Dorbar Shnong kan ieng skhem ha ki kyndon kiba kala buh kampher lada long kumno kumno ruh.
Nalor kane, u Bah Hiamdor rula pyntip ba ka jingialang kala shim rai ba kine ki kynrum kynram baroh ki dei tang ka jingiasngewthuh bakla namar kam shym la don satia ka jingkhang ia ki briew ba kin wankai sha krem Mawjymbuin.
“Ka KSP kala shah ialam bakla namar ki don ki briew, kiba pyrshang ban ialam bakla ia ki ba ong ba ym shah satia ban mane blei shapoh kane ka krem” ula ong.
