Kot palat 500 tylli ki skul ha Meghalaya ki bym pat ioh jingithuh ha ka UDISE

Shillong, Rymphang 14: Ki don palat 500 tylli ki skul ha jylla Meghalaya ki bym pat kynthup hapoh ka Unified District Information System for Education (UDISE).
Ia kane la pyntip da u Project Director ka SSA u Swapnil Tembe hadien ka jingialang bishar kam jong ka tnat Pule Puthi.

Haba kren sha ki lad pathai khubor u Swapnil Tembe u la iathuh ba kine ki 500 tylli ki skul kim don satia ha ka Unified District Information System for Education (UDISE) kaba dei ka kyndon jong ka Sorkar Pdeng ban ithuh ia kawei pa kawei ka skul hapoh ka Ri.

U Tembe u la ong ba ka jingithuh ka mut ba ki skul ki donkam ban ioh ia ki katto katne ki kot ki sla na ki bor Sorkar ne hashuwa ba kin treikam.

“Ki don ki kot ki sla kiba la ai da ki bor sorkar, kum ka nuksa ia ki skul Elementary, ki DSCO ki dei ban ai ia ka jingithuh. Ka lah ban long ka jingbit ban plie, ka lah ban long ka jingithuh ba shipor, ka lah ban long ka jingithuh ba neh hynrei namar ki jingleh mynshwa kine ki skul kila treikam khlem ka jingithuh” la ong u Tembe.

U Tembe u la ong ba ka Sorkar India ka la bthah ia baroh ki Sorkar Jylla ba kin shimkhia ia kine ki skul bym pat ioh jingithuh.

“Kumta ngi la bthah ia ki ophisar ban leit pynshisha la ki don ne em ia baroh ki jingdonkam ba kongsan khnang ba yn lah ban ai jingithuh noh ia kine ki skul” u la bynrap.

U Tembe u la ong ba ka tnat pule puthi kan sa pynmih shen ia ka rukom treikam (Standard Procedure) kaba la buh ryntih na ka bynta baroh ki nongshim bynta ban bud shwa ban plie ia kano kano ka skul hapoh ka Jylla.

“Lada don kiba kwah ban sdang ia ka skul ki hap ban pan jingbit, ki hap ban pyni ba ki hap ban donkam ia ki jingtei (Building) bad nangta yn sa ai ia ka jingbit ban plie, nangta ki lah ban sdang bad hadien lai snem lada ki leh bha, lada don ka jingpynrung kyrteng ki khynnah skul, yn ai ia ka jingithuh ba neh ne ka Certificate jong ka jingithuh bad yn pynmih ia u UDISE code” u la ong.