Shillong, Nailur 26 : Ka Jylla kala don ia palat 214 ngut kiba mih niangpyrsit ha ki 11 tylli ki jingkhie kynsan ka jingpang ha kine ki phra bnai bala leit noh kata naduh u Kyllalyngkot haduh u bnai Nailar.
Ia kane la pyntip da ka State Immunization Officer Dr Badira Mawlong haba iakren bad ki lad pathai khubor hynne ka sngi Palei.
“Kane ka dei kaba sngewbha bha ia ka Jylla jong ngi namar kiba bun ki kyntait ban ai injek niangpyrsit” kala ong.
“Don ki khep ba ki shim tang shi injek bad ki kein noh ia ka injek kaba ar. Khamtam ha ka Jaidbynriew jong ngi, kaba ki ngeit ba u Niangpyrsit u dei u “Niang Blei” bad ba ngim dei ban pynthut ia u Khunlung. (Hynrei ka jingshisha) ka bor met jong u Khunlung kan tlot bha ha kane ka por bad u khniang un shim kabu ban trei tyngeh bad bunsien, ki khunlung ki ju iap namar ka jingshit met, pynhiar bad kiwei kiwei” ong ka Dr Mawlong.
“Kumjuh ruh, haba ngi don ki Khun ba shit met bad mih khniang bad ngi donkam ban lum snam, hangne ruh ki kmie kpa ki ju kyntait, ki ju ong ba ngim long ban pynthut ia ki khunlung, kane ruh ka dei kawei ka jingsngewkhia” kala ong.
Kat kum ka jingong jong ka, kila don ruh bun ki khep ba poi ruh sha ka jingmatlah namar ka jingmih niang pyrsit.
“Nga kwah ban kyrpad ia phi baroh ban iarap lem ia ngi ha kaban pynshai lem halor u niangpyrsit. Ngi tip ba ki khot “Niang Blei” hynrei watla katta, lada kila ai injek, kin ym mih niang pyrsit shuh bad lada ki mih ruh kin mih da kibym pynshitom ki bym pyniap ia ki khunlung. Wat lada ki khunlung ki shitom bad don jingshit met bad mih khniang ruh, lada ki lah ai nuksa, ngi lah ban tip la u dei u niang pyrsit ne em”.
U Director ka NHM Ram Kumar ula ong ba 90% na ki nongshongshnong kila pdiang ia ka jingai injek.
“Ngi la nang pynkhlain ia ka jingpeitngor ha kine ki shisnem shiteng bad kumta ka jingshem ia ki nongmih niangpyrsit kala long da lai shah, kaba long n aka 80 tam ha u snem bala lah sah ka 214 ngut mynta” ula ong.
