Imphal, Iaiong 19 : Wat hadien ki kam umsnam, ki jingiashoh iadat, ka Manipur kala sakhi ia ka jingpoi thep vote haduh 68 % ngut ki briew naba haduh 15.44 lak ngut kila pyndep ia ka kamram ban jied ia ki nongmihkhmat sha Lok Sabha.
Ki jinghiar thma ki kaikhlaw, ki jingpynkulmar ha ki Polling Booth bad jingiakynad hapdeng ki ar kynhun, kala jia ha kane ka sngi thep vote ha ki district kum ka Bishnapur, Imphal East bad Imphal West bad haduh 6 ngut ki briew kila mynsaw.
Ka jingiathep vote kala sdang ha ka por 7 baje mynstep bad la sakhi ia ka jingiashimbynta ki briew haduh ka por 4 baje janmiet.
U Myntri Rangbah ka Jylla N Biren Singh bala synran da ka kurim, ula pyndep ia ka jingthep vote ha ka por mynsiem ha Srivan Higher Secondary School Polling Station bad kyrpad ban wanrah ia ka jingsuk bad jingiashimbynta ha ka jingjied nongmihkhmat.
Ka jingiathep vote ha ki 13 tylli ki jaka jong ka Outer Manipur (ST) seat, kaba la buh ha ka phase-II, kan long ha ka 26 tarik u Iaiong.
Palat 15.44 lak ngut ki nongthep vote ba kynthup ia 8.02 lak ki kynthei, kila ioh ban thep vote ban rai ia ka lawei jong ki 10 ngut ki kyrtong na ki artylli ki Lok Sabha seat ba kynthup ia 6 ngut ha Inner Manipur bad 4 ngut ha Outer Manipur.
