Shillong Nailur 20: Ka Khun Hynniewtrep National Awakening Movement (KHNAM) kala pynpaw ba ka long kaba kloi ban iatai nia bad u Myntri Rangbah ka jylla u Conrad K Sangma ha kaba iadei bad ka jingdawa ban pynduh noh ia ka Personal Interview ha ka thungkam Grade B, C bad D ha ka kam sorkar.
Ka KHNAM kala pynpaw ka jingsngewnguh ia u MLA ka UDP u Bah Nujorki Sungoh uba la rah ia ka mat ban dawa pynduh noh ia ka Personal Interview ha ki kam sorkar ha ka kyrdan Grade D.
“Ka seng naduh ki snem ba la leit, kala dep ban ai ia ki jingthoh kiba shai bad kiba shong aiñ sha u Myntri Rangbah ka jylla ban dawa pynduh noh ia ka personal interview na ki grade B, C bad D jong ki kam sorkar bad ngi la pynshai ruh ba wat ka sorkar India bad ki 23 tylli ki jylla bad 8 tylli ki UT ha ka ri India kila dep ban pynduh ia ka personal interview, hynrei haduh mynta ka sorkar jylla ka shu sngap jar jar” ong u Working President ka KHNAM Bah Thomas Passah ha ka kyrwoh khubor.
U Bah Passah ula ong, ba ha ka jubab jong u Myntri Rangbah mynta ka sngi, kam pynhun iaka seng KHNAM bad ka ngeit ba katei kam shym la pynhun ruh ia u MLA Bah Nujorki Sungoh lane ia kiwei kiwei ki nongmihkhmat jong ka iing dorbar Thawaiñ ka jylla.
Katkum ka jubab u Myntri Rangbah ula ai ba 50/50 % la bhah na ka bynta ka Written Test bad ka Personal Interview. 50% kala plie lad bha ia ki briew ba don haka bor ban tuklar lane mushlia ia ka iohkam iohkam hok jong ki samla.
Ula buh jingkylli ruh iaka jingkren u Myntri Rangbah uba la ong, ba la pynlong ia ka Personal Interview ban peit ruh ia kiwei kiwei ki jingdonkam ha ki kyrtong, ka jingkylli kaba ladei ban kylli ia u Myntri Rangbah ha iing Dorbar ka long “kiei kita ki jingdonkam kiba hap ban peit tang lyngba ka Personal Interview haba thung kam Sweeper lane kiwei kiwei ki kam grade 4?. Ka jingshisha ka long ba ia ka Personal Interview donkam tang ha ki jait kam kiba donkam ban peit ia ka personality jong u/ka kyrtong kum ka kam pulit ter ter.
“Ladei ban kylli na u Myntri Rangbah ba kiei kita ki jingduhnong lada pynduh noh ia ka Personal Interview, namar kumba ngi la thoh sha ka sorkar, ngi la batai shaikdar ba lada pynduh ia ka Personal Interview ka jingiohnong kan long :-1. Ki badei hok ban ioh kam kin ioh 2. Ka por jong ka sorkar kan ym sepei 3. Ka pisa ka sorkar kan ym sepei 4. Ki samla kiba applai kam kin ioh jibgkyrmen 5. Ki briew ba mlien ban pan pisa ban pynioh kam kin ym ioh lad shuh ter ter, ka jingduhnong lada pynduh personal interview ka long tang ia kiba don haka bor namar kin ym iohlad shuh ban leh shiliang lane leh politik ia ka hok ki samla” ong u Bah Passah.
U nongialam ka KHNAM ula ong ba u Myntri Rangabh ula ong, ruh ba ka sorkar ka dang peit bniah ia baroh ki bynta jong ka rukom thungkam bad kan shim por, kine baroh kidei tang ki jubab ban pynjlan ia kaei kaba la donkam ban leh noh.
“Ka seng ka long kaba kloi ban iathir bad u Myntri Rangbah ka jylla halor kane ka mat bad lada u Myntri Rangbah u jop ngin ym dawa shuh, hynrei lada ka ieng ka nia jong ngi, ka sorkar ruh kadei ban leh noh mardor ia kane ka jingthmu ba bha” la pynkut u Working President ka KHNAM.
