Shillong, K’lyngkot 09: U AICC incharge Meghalaya bad MP ka Tamil Nadu Dr A Chellakumar hynne ka sngi Baar ula ong ba kito kiba kren sniew bad kiba kynnoh ba ka Congress kadei ka jhad kaba la ngam, kin sa wan ban ieng laiñ haba ka seng kan wan biang ha ka bor.
“Kito kiba ong ba ka Congress kadei ka jhad kaba la ngam, lada ka Congress ka wan biang ha ka bor, kin sa ieng da u laiñ ban rung biang sha ka Congress. Ngan ai syndon da ka jingthoh mynta ka sngi” ong u Dr Chellakumar haba iakren bad ki nongthoh khubor hadien ba la wai ka jingialang jong ka seng Congress hapoh nongbah Shillong.
Ula pynpaw iaka jingskhem jingmut ba ka Congress kan wanphai biang ha ka bor hadien ka elekshon MP Lok Sabha 2024.
U Nongialam ka AICC ula ong, “Ki paidbah kim sngewtynnad ia ka BJP, kumta kumno yn lah ban ong, ba ka Congress kadei ka jhad kaba la ngam? Ka Congress ka dei ka sim Phoenix bad kan wan biang ha ka bor”.
“Ha ka elekshon sha Parliament ha u 2024, ka Congress bad ka kynhun INDIA Bloc kin sa thaw beit ia ka sorkar pdeng” ula ong.
Ula ong ba ki briew ki lah ban wan bad ban mih hynrei ka Congress kan ieng beit bad u paidbah.
U Dr Chellakumar ula ong, “Ngi la iohi la bun tylli ki elekshon, ka Congress kala rem ha kiba bun ki jylla hynrei ha ki elekshon kiban long biang ne hadien 10 snem ka Congress kan sa wanphai biang ha ka bor bad kan ioh syndon ia ka jingbun paid ban synshar”.
“Ha Telangana, ngi la ai iaka jylla hynrei u BRS Chandrashekhar Roa ula ialam bakla iaka Congress bad ula shim halade shimet ia ka nam bad burom halor kine kiei kiei baroh. Ula synshar iaka jylla la plat iaka 10 snem hynrei ki paidbah kila bret ia u shabar. Ia mynta ia kaei kaba ngi iohi ha Rajasthan, hadien ba la thaw iaka sorkar hapoh ka shi bnai, u Myntri Sorkar ula rem ia ka elekshon. Ka sorkar kadei ban resaiñ noh lada ka don ia ka nongrim bad iaka jingsngew ha kaba iadei bad ka kam politik, u Myntri Rangbah udei ban leit aiti noh ia ka shithi iehnoh kam mardor” la dawa u Nongialam ka AICC bad ka ong, “Kane kadei ka rai kaba pura bad kane kadei ka jingsngew jong ki paidbah ha Rajasthan”.
Ula ong ba ki paidbah hapoh ka ri bad kynthup ia ka Meghalaya ki kwah ba ka Congress kan wanphai biang ha ka bor.
U Dr Chellakumar ula ong, “Haba ki nongialam bad ki nongtrei ka Congress jong ngi ki iakren bad ki paidbah, ki paidbah kila pynpaw ba ki kwah ba ka Congress kan wan biang ha ka bor”.
“Ki paidbah ki kwah iaka Congress. Ki paidbah kim shym la thep vote pyrshah ia ka Congress bad kim shym la jied hi ruh iaka BJP. Kial pyni iaka jingdom ka jongki ia ka seng BJP ha kane ka elekshon shiteng samoi kaba dang shu dep. Kila pyndonkam bakla, ialam bakla bad pyndonkam ia ki bor pyniaid elekshon bad kila knieh jubor iaka jingjop” ong u Dr Chellakumar.
Ha kawei pat ka liang u Nongialam ka AICC ula ong ba ka seng ka pdiang sngewbha ia kito kiba kwah ban pyniasoh biang bad ka Congress hynrei ki don ruh ki bynta halor kane ia kaba ym shim la kwah ban batai eiei mynta, namar ki don kiba la shet kylla iaka seng Congress.
“Lada don kino kino kiba don jingshaniah haka nongrim jong ka seng Congress, ngi pdiang sngewbha ia ki sha ka seng Congress hynrei lada don pat kiba khmih lynti ia kaei kaei kumta kan long kaba eh ia ngi ban pynhun iaka jingkhwan ka jongki. Kumta ngin sa khmih bniah ia iwei pa iwei I briew bad halor kata, ngin sa shim ia ka rai” ong u Dr Chellakumar.
