Tang u Bah Ardent Basaiawmoit u ‘riewkhuid’ ha Meghalaya
Shillong, Lber 21: U President ka National People’s Party (NPP) bad Symbud Myntri Rangbah ka Jylla Bah Prestone Tynsong, ula kob ia ka Liang Pyrshah Voice of the People Party (VPP) ban sa sei ia ki sakhi satar/kot pynshisha (blue print) ban pynshisha ia ka jingieid jong ka ia ka ‘Jaidbynriew’.
Haba kynthoh, u Bah Prestone ula ong ba ka VPP kala lapmiet ka kam ba ka dei tang ma ka na ki Political party, kaba ieid ia ka ‘Jaidbynriew’ lane ia ki ‘Trai ri’.
“Hynrei nga kwha ban ioh ia ki kot pynshisha (blueprint) jong ka VPP. Lada phi kwah ia ka lawei kaba don jingkyrmen bad ba phi ieid Jaidbynriew palat, pyni ia nga ia ki sakhi satar, ioh nga ruh ngan pyniasoh noh bad phi” ula bynrap.
Haba kyntu ia ka VPP ba kam dei ban shu pynsyrwa kai ia ka por ha kaban pynbiej ia ki paidbah ha ka kyrteng ka Jaidbynriew, une u Heh ka NPP ha Jylla ula ong “Lada phi (Ardent M Basaiawmoit) dei u Nongialam ba shisha bad phi ieid shisha ia la ka Jaidbynriew- phi la long MLA la 11 snem-pyni ia nga ia kaei ka synniang jong phi khnang ba ngi ruh ngin ngeit ba phi ieid shisha ia ka Jaidbynriew”.
U Bah Prestone ula pynkynmaw ruh ba u President ka VPP ula ialam ia ki paidbah ban mih surok pyrshah ia ka kam ba iadei bad ka Building Byelaw ha ka por jong u Mukul Sangma kum u Myntri Rangbah ka Jylla bad ong “Hynrei ka jingiakhih kala shu kut syndet khlem da poi shano shano ruh”.
“Hynrei ka jingkylli ka long ba mano ba kitkhia ban pynbeit ia kane ka ishu (ba iadei bad ka MUDA ba kyntur sha u pud u sam ka Sixth Schedule)?. Hato kam dei ha u 2018 hapoh ka jingialam u Bah Hamlet Dohling kum u Myntri kam pynroi sor ba ia kane ka kam la lah ba pynbeit bad la wanrah ruh hapoh ka jingialang ka Kynhun Myntri?. Namar kata, nga kyntu ia ki paidbah ka Shillong Constituency ba kin rai da ka jingstad ym ban shu ngeit matlah ia kaei kabab ki ong khlem da wad ia ka jingshisha” ula ong.
Halor ka jingkynnoh jong ka VPP pyrshah ia ka Sorkar MDA ba ialam da ka NPP, u Bah Prestone ula ong “Ngim sngew phyla ia kane namar ngi la iohi ia ki briew kiba kawang maw ia ka party jong ngi la ka dei ha Ri-lum Garo ne hangne ha Ri-lum Khasi jaintia ha ka por elekshon MLA 2023. Hynrei wat hapdeng kane, n aka 19 seat ha u 2019, ka NPP kala kiew ha ka jingjop sha ka 26 ngut ha ka elekshon 2023. Kane hi ka pyni shai ba kito ki jingkynnoh pyrshah ia ka NPP ki dei tang ki ishu ban pynbiej ia u paidbah ha ka por elekshon. Ki paidbah hi ki don khmat, skhor bad jabieng ban bishar ia ki kam bala leh da ka Sorkar NPP ha ki san snem bala leit noh bad ruh ha kane ka shisnem jong ka Sorkar MDA-2 ba ialam ka NPP”.
“Mynta ruh kila mih shibun ki jingkynnoh pyrshah ia ka NPP khamtam da ka seng thymmai ka VPP, ia kaba la iohi ba kim don eiei ban kren lait noh tang ka jingpynbiej ia ki paidbah da kaba kam ba ka dei tang ma ka na ki party, kaba ieid ia ka Jaidbynriew. Ha ka jingshisha, nga kwah ia ki ban pynshisha ba ha kano ka rukom ba ki ieid shisha ia ka Jaidbynriew. Nga kwah ruh ban kylli ia ka VPP ba haduh katno inchi lane kilometer ka surok ba kil adep shna, katno tylli ki hospital ba kila shna, katno tylli ki kam kiba bha ba kala leh ia ka Jylla Meghalaya” ula ong haba buh jingkylli ia ki kam pynroi bala wanrah da ka VPP ha ki saw tylli ki Constituency ba ka mihkhmat.
Nalor kane, u Bah Prestone ula ther tyngeh ruh ia u President ka VPP (Ardent M Basaiawmoit) halor ka jingkynthoh pyr shah ia ki Nongialam Niam, ki Nongialam Balang, ki Nongialam Sengbhalang bad ki Nongialam seng sain pyrthei bad pynman ialade kum u briew uba ‘Khuid eh”.
“Hooid, nga la iohi ia ki jingkren jong u President ka VPP ba baroh ki dei ki riewpop suda. La I ba u briew uba hok duh hangne u dei u Nongialam ka VPP. Nga sngewsih ba ki jingkren jong u, kila ktah ia ki nongialam Balang bad nongialam Niam, ia kaba na sngew ba ka dei ka jingleh ba bakla bha bad kaba dei ban kiar. Ula kynnoh ruh ia ki Nongialam Seng bhalang bad nongialam seng sain pyrthei ba ki dei kiba sniew bad pyrshang ban pyni sha ka pyrthei ba tang ki nongialam ka VPP ki dei ki riewkhuid” ula ong.
“Namar kata, ngi kyntu ia ki paidbah ba kin phikir bha na kum kine ki Nongialam, kiba kren tang ban kdew kti ia kiwei namar wat ka jingkren ka ong ba ym don mano mano ruh ba khuid bad nga iohi ba kum kine ki jingkynnoh kim dei na ka bynta ka bha ka miat jong ka imlang sahlang lane jong ka Jylla” ula ong.
U Bah Prestone ula pynkynmaw ruh ba u Bah Ardent Basaiawmoit ula leit pyniasoh teng sha ka UDP bad u dei ruh u President barim ka HSPDP bad ong “Ha katei ka por, haba phi leit ialap elekshon phi ju kam ba ka UDP ka dei kaba biang eh bad ka HSPDP ka dei ka seng sain pyrthei kaba la rim bha kaba iakhun na ka bynta ka Jylla la ka jong bad mynta pat phi la ong ba ki dei kiba sniew?. Namar kata, ka shong ha ki paidbah ba kin bishar bad shim rai da ka jingstad haba jied MP”.
“Nga kyrpad ia ki paidbah ba kin pyllait im ialade na ka umsaw kaba wan bad ka ban sa rngat noh tang khyndiat por” ula ong.
 bad Symbud Myntri Rangbah ka Jylla Bah Prestone Tynsong, ula kob ia ka Liang Pyrshah Voice of the People Party (VPP) ban sa sei ia ki sakhi satar/kot pynshisha (blue print) ban pynshisha ia ka jingieid jong ka ia ka ‘Jaidbynriew’.){kind=link}