Ther tyngeh ia ka BJP ba pynslem mynjur ia ka ILP
Shillong, Rymphang 21 : U National Vice President ka National People’s Party (NPP) bad Symbud Myntri Rangbah ka jylla Bah Prestone Tynsong ula kob ba ka NPP kam donkam satia ia kiwei pat ki seng sain pyrthei ban thaw iaka sorkar kaban wan namar ka NPP kan jop haduh 33 ne 34 Seat ha ka MLA Election 2023.
“Ngim donkam shuh ia kiwei ki seng sain pyrthei ban iatreilang ha ka ban thaw sorkar, namar ka NPP kan thaw hi marwei iaka sorkar bad kan jop haduh 33 ne 34 Seat ha ka elekshon ban long la 27 tarik” kob u Bah Prestone haba iakren bad ki nongthoh khubor hynne ka sngi.
Ula ong, baroh shi katta ki seng sain pyrthei bapher bapher naduh ka UDP, BJP, HSPDP, PDF, NCP ki dei kiba ia donlang ha ka sorkar MDA naduh ba sdang, hynrei mynta ki sdang ban kynnoh bad kynthoh pyrshah iaka seng NPP kaba ialam iaka sorkar MDA.
“Ka jingkawang ktieh kitei ki seng mynta iaka NPP ka jur bha khamtam eh ia u Myntri Rangbah ka jylla (Conrad Sangma) bad ia nga kum u Symbud Myntri Rangbah. Kane ka paw shai kdar ba ka seng NPP ka khlain ha kylleng sawdong ka Meghalaya kaba la pynlong ia kine kiwei kiwei ki party ban tieng ban smiej bad ki pynthohbria laiphew jait” ong u Bah Prestone.
“Kiei kiei ki jingkynnoh baroh ban pynthohbria iaka NPP, ka jingshisha kan sa paw ha ka 2 tarik ka sngi niew vote bad nga ngeit skhem ba ki paidbah kila sngewthuh ban pynshong nongrim bha ba dei tang hapoh ka jingialam u Conrad Sangma bad Bah Prestone Tynsong ba la shim ia ki ishu kaba kiwei kiwei ki seng sain pyrthei kim.ju nud ban shim la kadei ka Them Metor, Jingpynbeit ia u pud u sam, IL, ban dawa pynrung ia K ktien Khasi bad Garo ha ka Eight Scheduled. Dei ma ngi na ka NPP kiba la maitphang ia kine bad rah sha ka iing dorbar thawain ka jylla ban iakren ia kine kiei kiei baroh” ong u Bah Prestone.
Ula ong, ka ibiej iaka seng BJP kaba ong mynta ban shimkhia iaka ishu ILP namar mynta la 4 snem duna, la phah iaka resolution sha Delhi hapoh ka jingsynshar ka BJP bad ngi lah iakynduh haduh 7 ne 8 sien ban pynkynmaw ia ka ILP, ban pynrung iaka Khasi bad Garo ha ka Eight Schedule bad ban pynkynmaw ruh iaka jingpynkylla thymmai ia ka MRSSA, hynrei kala shu buh sha kyndong ia kitei ki jingdawa u paidbah bad iaka jingkyrpad jong ka sorkar jylla.
“Mynta ha ka por elekshon ki kwah ban pynbeij bad ki ong ba ki kwah ban iakren sani bha halor kitei mat jingdawa bad kane baroh kadei tang ka jingpynbeij bad jingpynthame kaba laiphew jait ia u paidbah” ula ong.
“Ka NPP kala iengskhem ban shakri ia u paidbah lyngba ka Election Manifesto bad Vision Document na ka bynta u snem 2023-2028 bad ngi la pyni shai ia ki mat treikam kiba ngi ngin leh bad wat ia kaba ngim lah ban pyndep ngin ialeh ban pyndep noh ia ki” ula bynrap.
U Bah Prestone ula ong, ki paidbah kidei ban bishar ia ka rukom kynnoh bad ia ki rukom kren ki jongki (kiwei ki seng sain pyrthei) kaba baroh baroh ki kynthah bad kawang maw beit tang iaka NPP.
