Shillong, Rymphang 15 : U National General Secretary ka AITC Abhishek Banerjee hynne ka sngi Balang, ula kob baka National People’s Party (NPP) kan ioh da u ‘Nod’ na Ri-lum Garo bad u Myntri Rangbah ka Jylla Conrad K Sangma un shah rem nala ka jong ka Constituency.
“Nga la ju iai ban ba ka NPP kan ioh da u nod na Ri-lum Garo, kaba don 24 seat. U Conrad Sangma un rem na ka constituency la jong. Hynriew bnai mynshuwa, ki ong ba ka Trinamool Congress kam don nongrim hangne, hynrei mynta lada phi peit ia ki jingkren, ki tweet, phin iohi ba ki sngi jong ki ka sdang da ka jingkawang ktieh iaka TMC” ong u Abhishek haba iakren bad ki nongthoh khubor ha South Tura.
Ula ong ba haba u iaid lynti lyngba ka ophis u Depeuty Commissioner, Treasury Office, DIG Office bad Tura Police Station, u shem ba ha shilynter kane ka lynti ka dum tliw tliw bad ym don streetlight satia ha baroh arliang ki surok.
“Lada u CM um lah ban wanrah jingshai hala ka jong ka constituency, kumno un wanrah ia ka roi ka par ha ka Jylla” ula buh jingkylli.
Haba pynpaw ba naduh ki Hospital haduh ki skul bad College baroh ki long kynrum kynram bha, u Abhishek ula ong “Ka Shillong Medical College ruh ka don ha ki kot ki sla. Ka Tura Medical College ruh kaba shu sahkut sah. Ka Bengal ka don haduh 23 tylli ki Medical College ha kaba 16 tylli ki dei jong ka Sorkar bad kiba tam ki dei jong ki riew shimet. Ka Bengal ka don 23 tylli ki District katba ka Meghalaya ka don12 tylli ki college hynrei kam pat don kawei ruh ka Medical College. Kane ka dei u soh jongka sorkar double-engine”.
Nalor kane, une u Heh ka AITC ula ong ba ym pat ju don satia ha kino kinokijaka jongka Ri ban iohi ia ka jingjia kumba jia ha Mukroh. Lai bnai kala iaid naduh ka jingiasiat ha Mukroh hynrei ym pat don ka jingpynshitom ia ki Ophisar kiba siat ia ki briew ba lui lui.
Haba pynpaw ba ka Bengal ruh ka don ia u khappud bad ka Assam, Jharkhand bad Odisha kumba long ka Meghalaya bad ka Assam, ula ong “Ym don ba nud ban siat ia 5 ngut ki briew ha Bengal namar ka kyrteng ka CM jongngi ka dei ka Mamata Banerjee”.
U Abhishek ula pyntip ba ka Mamata Banerjee kan sa wan biang sha Meghalaya ha ka 22 tarik Rymphang bad kala aiktien ba “kan ym sngap jar ha kaban iakhun naka bynta ka roi ka par ka Meghalaya”.
“Nga kular ba mar syn iohthaw Sorkar ka Trinamool, hapoh shibnai, barohki Ophis ba donkti haka jingiasiat ha Mukroh kin shah kem bad yn ym map satia ia kiba donkti” ong u Abhishek.
