Shillong, Rymphang 15: U National Secretary ka BJP u Rituraj Sinha hynne ka sngi ula ther ia ka seng Congress da kaba ong ba ka shi vote kaban ai sha ka Congress kan dei ka Vote kaba long lehnohei.
“Ka Congress kan ym don bynta haka sorkar. Mano ba kwah ba u MLA yn shong 5 snem ha ka liang pyrshah bad yn ym lah ban leh eiei naka bynta ki paidbah ka constituency,” ong u Sinha.
Une u National Secretary ka BJP ula ther ruh ia ka seng Trinamool Congress kaba na West Bengal bad ula ong, ka seng TMC ka mut “T= Tollabazi, M= Mass Bangladeshi inflation bad C= Cut Money & Corruption” bad ka kynnoh baka TMC ka pynlong tang iaka “election tourism” ha ka jylla Meghalaya.
“Ki don ki seng sain pyrthei kiba shangkai kylleng kylleng ka jylla bad ki ialap elekshon mynta hynrei ha u 2018 kim shym la don satia ha ka elekshon ha Meghalaya. Ki ai iaki jingkular kiba heh, ki jingpynbna kiba heh ha ki lad pathai khubor. Nga kwah ban kylli iaka jingkylli na ki nong Meghalaya, Hato kine ki seng sain pyrthei kin don haka elekshon kaban long ha u 2028? Ym don ba tip thikna, ki don hangne naka bynta ka Election Tourism,” ong u Sinha.
Ha kaba iadei bad ka seng Congress, u Sinha ula ong, baroh ki tip hapoh Meghalaya, ki paidbah ki long kiba stad bad kiba shemphang ba kawei ka Vote kaba ai sha ka seng Congres kadei ka Vote kaba lehnohei.
Ula ong, ka manifesto jong kiwei pat ki seng ka lah ban long kaba thamula hynrei ka jong ka BJP kadei ka Vision Document- ka Resolution kaba la shim hapoh ka jingialam u Myntri Rangbahduh ka ri u Narendra Modi.
Une u nongialam ka BJP ula ong, ka Congress na ka jingdon 28% iaka Vote Share ne ka jingioh Vote ha ka elekshon kaba la dep, mynta kan ioh hapoh jong ka 2% ka Vote Share ha kane ka Election MLA kaba mynta.
