Shillong Jylliew 21: U Chief Whip jongka Liang Pyrshah ha ka Iingdorbar Thawaiñ ka jylla u Bah George B Lyngdoh uba long ruh u MLA ka Umroi, hynne ka sngi ula iathuh ba ka All India Trinamool Congress kala nang ioh bor man la ka sngi katba ka jylla ka dang pynkhreh iaka elekshon MLA kaban long ha u snem 2023.
U Bah Lyngdoh u la ong, ka seng kala nang suhthied bad nang khlain ha kylleng ki bynta jong ka jylla watla kane ka seng ka dang long kaba thymmai.
“Ngi lah dep ban thaw ia ki kynhun treikam ha ki 50 tylli ki constituency. Ngi la dep ruh ban pyndep ha baroh ki 24 tylli ki constituency ha rilum Garo bad kiba sah ha rilum Khasi” ong u Bah Lyngdoh.
U la iathuh ba ki paidbah kila pdiang ia ka AITC ha kylleng ki bynta jong ka jylla ha ka jingiaid lynti ka jongki ban ioh iaka synshar khaddar kaba khuid ba suba khamtam naduh ba ka AITC kala long ka seng kaba ialam iaka Liang Pyrshah ha ka iing dorbar thawain ka jylla.
U la ong, ka jingai jingkyrshan jong ki paidbah na ka thain sor bad nongkyndong ka long kaba sngewkmen bha bad ka AITC Meghalaya kan trei shitom halor ka jingdonkam bad ia ki ishu kiba ktah ia u paidbah.
