Nongpoh, Naiwieng 28:Ki artylli ki Integrated Village Cooperative Society (IVSC) ba kynthup iaka Mawlong Nongtluh IVCS bad ka Umwang IVCS hynne ka sngi nyngkong, ki la ioh iaki symbai jhur ka Meghalaya Basin Development Agency, Ribhoi District kum ka jingiarap ia ki nongrep ba kin lah kyntiew ia ka ioh ka kot.
Ia kine ki symbai jhur la sam da u MLA ka Nongpoh Bah Mayralborn Syiem ha ka jingialang bala pynlong ha Dorbar Shnong, Mawroh, Nongpoh.
Haba iakren bad i kong Ridian Syiem , dkhot ka Mawlong Nongtluh IVCS i la pynpaw iaka jingkmen halor kine ki jingkyrkhu ba la theh lyngba ka tnad Basin bad pynpaw ba lyngba kane ka jingai jingiarap iaki symbai jhur sha ki nongrep, ka la long ka jingmyntoi shibun ha kaba ki nongrep ki la lait ban thied ia kine ki symbai jhur ha kador ka ba rem.
Na ka liang u bah Marlam Kupar Kharmudai DPM ka MBDA u la ong ba na ka liang ka tnad treikam jong ka Basin ki ialeh kat ba lah ban theh iaki jingiarap sha ki nongrep khnang ba kan long ka jingmyntoi iaki briew kiba im daka rep ka riang, bad mynta ka sngi ki la ioh ban ai iaki symbai jhur bapher bapher sha kine ki artylli ki IVCS khnang ba kine ki dkhot jong ka IVCS kiba dei ki nongrep kin ioh ban rep hadien ba ki la dep ot ia u kba.
U la pynsngew ruh ha Ribhoi ki don 4 tylli ki IVCS bad hapoh ka Umling block ki don artylli ki IVCS kata ka Umwang IVCS bad ka Mawlong Nongtluh IVCS, bad ka tnad Basin ka sngew sarong ban iohi ba kawei na kine ki IVCS kata ka Umkon IVCS ka wan ha ka kyrdana ba hakhlieh duh hapoh ka jylla, bad kane ka IVCS kam leh tang ki kam ban kynshew pisa hynrei ka leh ruh bun jait ki kam.
