Agartala, Nohprah 28 :U khun syiem ka Tripura uba dei ruh u chairman ka TIPRA Motha, u Pradyot Kishore Manikya Debbarma ha ka 27 tarik mynta u bnai ula ong ba lada kalong kaba donkam un die ia ki jingdon jingem ki jong u bad ia ka iing ka sem ha ka jingialeh kaba khatduh ban pynioh ia ki hok kiba katkum ki riti synshar khadar na ka bynta ki trai shnong riewlum ka jylla.
Lyngba ka Facebook live ha ka janmiet jong ka 27 tarik Nohprah, u Pradyot ula kynthoh tyngeh ia ki katto katne ki lad pathai khubor halor ka jingpynmih ia ki khubor kiba shu antad pyrshah ia u.
“Nga don ka jingshitom kaba iadei bad u khyllai bad ka pneumonia ha kaba Nga la hap ban shongthait shipor.Mynta Nga la don ha Kolkata ha ryngkat i mei jong nga bad hadien katto katne por Ngan wanphai sha Agartala.Nga la iohi ia ki katto katne ki jingmih khubor ki bym shisha ha kba ki la kam ba Nga la shah sumar ha AIMS ha Delhi bad pynlong ruh ka jingiakynduh ia u Myntri ka sorkar pdeng u Amit Shah lane bad ki katto katne ki nongialam.Nga kwah ban pyntip ba 99 percent na kitei ki jingmih khubor kiba shu thaw bad mutdur hi kim don ia ki jingshisha, hynrei ka jingshisha hi ka long ba hadien ka jingialang bad ki lad pathai khubor Nga la kem pang bad hadien Nga la leit sha Mumbai na ka bynta ka jingsumar bad mynta Nga la shong jah thait ha la iing.Lada dei ba Ngan hap ban iakynduh ia u Amit Shah, u PM Modi lane kiwei pat ki nongialam, Ngan leit ha kaba paw ym ha kaba rieh.Kaei kaba Ngan kren ne pynpaw Ngan leh ha kaba paw,” ong u Pradyot.
Nalor kata ula ong ruh ba khlem kano kano ka jingpynthikna lyngba ka jingthoh kan ym don satia kano kano ka jingiasngewthuh jingmut bad kino kino ki party sain hima.
“Ka jingiateh lok kan urlong bad kino kino ki party ki ban kyrshan ia ka jingdawa ka jong ngi na ka bynta ka ‘Greater Tipraland’ lyngba ka jingthoh.Khlem kano kano ka jingpynthikna lyngba ka jingthoh kan ym don satia kano kano ka jingiasngewthuh jingmut.Ngan ym lah ban thok iala ki jong ki nongtrei bad ki briew ki jong nga na ka bynta katto katne ka pisa ne ka jingiabhah seat,” ong u Pradyot.
“Ngam kwah pisa, ka bor ne ka kam (post).Nga kwah ban trei na ka bynta ban pynioh ia ki hok na ka bynta ki briew jong Nga.Naduh ki 75 snem kiba la leit noh ki paid nongshong shnong kila mad ia ki jingeh ha ki shnong ki thaw.Ia kine ki jingeh yn lah ban weng lada ka jingiatylli ka don, bad ngi kyntu ia ka sorkar India ba kan weng ia kine ki jingeh jong ngi lem kumta ngim ym ia pein,” ong shuh shuh utei u nongialam ka TIPRA Motha.
Da kaba kam ba ka dei ka jingialeh kaba khatduh, u Pradyot ula ong; “Ki nongshong shnong ka Tripura ki long kiba bha hynrei ka jingeh ka long ki nongialam ki jong ngi ki bym don ka jingiatiplem.Wat ha ka party ka jong nga ruh Nga la sakhi ia kane.Ka BJP ka don ia ka bor pisa hynrei Nga don ia ki briew jong nga bad ka jingkyrkhu jong U Blei.Kane ka dei ka jingialeh kaba khatduh jong nga bad lada kalong kaba donkam Ngan die wat iala ka jong ka iing ka sem, ki jingdon jingem hynrei ngan ym die ia ki briew jong Nga.”
