Shillong, Risaw 02: U MLA barim ka Mawlai Constituency u bah P. T Sawkmie u badei ruh u nongialam ka United Democratic Party (UDP) ula ong ba u long bala kloi ban iakhun iaka elekshon MP Lok Sabha 2024 lada ka Party ka ibit
Lah ban kdew ba nalor ka kyrteng u bah P. T Sawkmie, ki kyrteng kiba la mih ki kynthup ia u Myntri Sorkar bah Paul Lyngdoh, CEM barim ka KHADC bah Titosstarwell Chyne bad u bah Jemino Mawthoh bad kine ki kyrteng kila saphriang ha ki lad pathai khubor ba ki kwah ban iakhun iaka MP Lok Sabha Ilekshon 2024 na Shillong Parliamentary Seat.
Haba pynshai ia kane ka khubor u bah P. T Sawkmie ula ong ba haduh mynta ka Party kam pat shim rai haba iadei bad ki kyrtong iakhun iaka MP Lok Sabha 2024 na Shillong Parliamentary Seat hynrei kum uwei nongmihkhmat ba la ih bha haka sain hima, u long bala kloi ban iakhun lada ka UDP ka ibit.
U bah P. T Sawkmie ula kam ba ula don palat 30 snem haka kam sain hima pyrthei ban shakri iaki paidbah bad lada u shah jied ban long MP kan nang plie lad shuh shuh ban nang shakri iaka Meghalaya baroh kawei.
“Lada ka UDP ka ibit ia nga, nga long bala pynkhreh ban iakhun iaka MP Lok Sabha ilekshon 2024 na Shillong Parliamentary Seat hynrei ia kane ka rai yn shim hadien ka jingialang jong ka Party ban iakren halor kane ka phang” la ong u bah P. T Sawkmie.
