Kloi ka sorkar ban iakren bad ka HNLC katkum ka riti synshar ka ri, ong u Lat ka Jylla

Shillong, Kyllalyngkot 26: U Lat ka jylla u Phagu Chauhan ula ong ba ka jylla Meghalaya ha u snem bala dep kala mad iaka shongsuk shongshngain bad ka sorkar ka long kaba kloi ban iakren bad ka kynhun kieng atiar Hynniewtrep National Liberation Council (HNLC) katkum ka riti synshar ka ri.

U Lat ka jylla ula kren ia katei kum u Kongsan ha ka jingrakhe iaka Republic Day kaba 75, kaba la long hynne ka sngi Thohdieng ha Madan Polo, Shillong.

U Lat ka jylla haba kren ha ka jingialang ula ong, ba ka Republic Day kadei ka sngi kaba khraw bad dei ban iengskhem ha kaban bat ia ka nongrim kumba la thoh haka riti synshar ka ri bad ula pynpaw ia ka jingsngewnguh bad ai burom ia ki nongialam ka ri bad ia ki khla wait jong ka jylla bad ia ki riewshlur kiba la len iala ka jongim ban iada ia ka jingsynshar ka aiñ.

“Ka sorkar ka iengskhem ban pynneh ia ka shongsuk shongsain ha ka jylla bad sa shisien ka iengskhem ha ka nongrim ba ka long kaba kloi ban iakren bad ka seng HNLC katkum ka riti synshar ka ri bad katkum ki kyndon jingbthah jongka Ministry of Home Affairs” ong u Lat ka jylla u Phagu Chauhan.

“Ha u snem bala dep ka jylla kala mad iaka shongsuk shongsain bad ngi la iaid shakhmat ha kaban pynbeit ia ka jingiakajia pud hapdeng ka Meghalaya bad Assam. Hadien ka jingthaw ia ka histori ia ka jingiasoi ia ka Soskular ha u Lber 2022 na ka bynta ki 6 tylli ki jaka kiba don hapdeng ka jingiakajia pud, ki kam jong ka jingsorbe ia ki jaka kila iaid shakhmat ban phiah ia u pud u sam. Ki arngut ki Myntri Rangbah kila iakynduh biang ha u Jymmang 2023 ban sdang ia ki kam ki jam ban pynbeit noh ia u pud u sam jong ki 6 tylli ki jaka kiba don hapdeng ka jingiakajia pud bad la thaw ia ki Regional Committee ha kitei ki thaiñ bad kila lum ia ki jingialang bad ka jylla Assam” ong u Lat ka Jylla.

Ula ong ba ka Tnad Home (Police) kala sdang iaka District-Level Police Infrastructure bad Police Housing bad la nang pynkhlain ia ka Fire Emergency Services katkum ka jingdonkam. Yn pyndep ha ka por kaba biang ia ka jingthungkam na ka bynta ki 3000 tylli ki kam kiba lait.

Ula ong, ba ka Meghalaya kala pdiang ia ka State Anthem kaba rakhe iaka jaka, ki briew bad ka kolshor da kaba buh hakhmat ia ka jingiatylli bad la thaw ia ka Anthem ha ki ktien sorkar katkum ka Meghalaya State Language Act 2005.

U Lat ula kren ruh ha kaba iadei bad ki kam pynroi kiba ka sorkar kala leh na ka bynta ban kyntiew iaka roi ka par bad ia ka ioh ka kot jong ka jylla bad ula pynbna ba kan long ka jingsahnam ha ka histori, ha kaba ka yn plie ia u motdur ba shi rynnieng jong u Tirot Sing Syiem ha Dhaka Bangladesh ha ka 16 tarik u Rymphang 2024.

“Da kaba iaid ryngkat lang bad ka jingangnud u Myntri Rangbahduh ka ri u Narendra Modi ban pynlong ia ka ri India kaban kynjoh iaka ioh ka kot kaba 5 Trillion US Dollar ha u snem 2025, ka sorkar Meghalaya kala buh ia ka thong ban pynlong ia ka Meghalaya ba kan kynjoh iaka ioh ka kot kaba 10 Million US Dollar ha u snem 2028 kaban kyntiew arshah iaka GDP jongka jylla. Ban pynurlong ia kane, ka sorkar ka dang pynkhreh ia ki buit treikam ban roi ha baroh ki liang bad ka dang iaid ha ka lynti ban pynbiang iaka jingbei tyngka” ong u Lat.

U Lat ula kren ruh ha kaba iadei bad ki kam pynroi kiba ka sorkar kala leh naka bynta ban kyntiew iaka roi ka par bad ia ka ioh ka kot jong ka jylla, da kaba pynbiang ia ki surok bad ki lynti ki syngkien, ka umbam umdih ha man la ki iing, ban pynbiang ia ka bording elektrik bad ba kan ym don kano kano ka jingthud, ka jingtei ia ka Mawdiangdiang Administrative City bad ia ka Secretariat kaba thymmai ha New Shillong Township bad ka sorkar ka dang pynkhreh ban tei ia ka Knowledge City kaba thymmai ha Mawkhanu.

Ban wanrah ia ka jingkylla ha ka nongbah, ka sorkar kan sdang pyniaid noh da 100 tylli ki bos elektrik hapoh u snem 2025 bad kane kan iarap ha kaban pynduna ia ka umphniang bad ka sorkar ka dang wad ia ki lad ki lynti ban don noh ka jingkamai ki liengsuin kaba man la ka sngi na Shillong sha Delhi, Mumbai, Hyderabad bad Bangalore bad ka sorkar ka don ia ka jingthmu ban pyntreikam pura noh ia ka Baljek Airport ba kan don ka jingkamai ki liengsuin na Tura sha Shillong.

U Lat ka jylla ula kren ruh ha kaba iadei bad ka jingthmu ka sorkar ban kyntiew iaka kam rep kam riang bad ki kam ri ia ki jingri ki bapher bapher, ka jingkyntiew ia ka kam jngohkai bad kiwei kiwei kiba long ki lad ban aikam aijam.