SHILLONG, Iaiong 25: Namar ka jingkha roi ki kam sniew ha ka thain khappud kum ki kam runar bad ka jingioh rungtuh ki briew na shilliang pud ka Bangladesh, ka jingialang jong ka Joint Coordination hapdeng ki shipai Border Security Force bad ka Hynniewtrep Youth Council kala long mynta ka sngi ka BOP Beltoli ha ka jingdon lang ryngkat bad ki nongmih khmat na ki dorbar shnong.
Ha kane ka jingialang, ki nongmih khmat ka HYC- Jatap bad Shella Area unit kila pynsngew sha ki heh ka BSF halor ka jingkiew bad kharoi ki kam sniew ha khappud kum ka jingioh lad ban rung sha India da ki briew na Bangladesh bad kane kan buh jingma ym tang ia ki paidbah kiba shong basah ha ka thain khappud hynrei ia ka ri hi baroh kawei.
Dei halor kane, ka HYC kala kyrpad ia ki ophisar jong ka BSF ba kin pynkhlain ka jingpeitngor ha shi lynter jong ka International border bad ban leh katba ban pynduh jait ia baroh ki kam sniew ha khappud bad ka HYC kala kular sha ki BSF ba ka kloi ban ia trei lang bad ban iarap ia ki BSF ban pynlong ia ka thain khappud kaba shngain.
Ka jingialang kala kut da ka jingsngewtynnad ha ryngkat bad ka rai ban ia trei lang ryngkat bad ban iakhun pyrshah ia kikam sniew kum ka jingkhaïi tuh bad ka jingwan rung tuh ki briew ha baroh kawei ka khappud.
Ki ophisar na ka BSF kiba la wan ia don lang ha kane ka jingialang ki kynthup ia u Kamal Khulbe DIG (G) Frontier Meghalaya (BSF), Akhilesh Jha, AC (BSF), u Inspector K Chin Biak (BSF), u Inspector Shyamsunder (BSF) katba na ka HYC ki kynthup ia u Bah Pyndapbor Shongwan, HYC – Jatap Unit, President, u Bah Batynshain Natep, HYC- Shella Area Unit, Vice- President bad u Bah Ostar Shongwan, Member, Dorbar Shnong Mustoh.
