Tura Risaw 03: Ka Working President jong ka Meghalaya Pradesh Congress Committee (MPCC) Deborah Marak hynne ka sngi Ba-ar, kala pynpaw ba ka long kaba kloi ban shimkhia ha kaban ialeh katba lah ban wan ialam biang ia u Dr Mukul Sangma sha ka seng Congress, lada ka ioh iaka jingbit na ki heh jong ka seng Congress.
Ka seng Congress kala lum ia ka jingialang jong ki nongialam bad ki nongkitkam ha ki Block bad ki District Committee ha Congress Bhawan, Tura.
Ha katei ka jingialang kaba long kaba kongsan bha hashwa ban long ka elekshon Lok Sabha, ka Deborah Marak kala ong, ba ka long kaba kloi ban trei shitom ban ialeh ban wan ialam biang ia u Dr Mukul bad kiwei pat sha ka seng Congress hynrei kane kan jia, tang lada ki nongialam kiba heh duh jong ka seng Congress ki shim ia ka rai.
Kum ban shu pynkynmaw u Myntri Rangbah barim ka jylla u Dr. Mukul Sangma ryngkat bad ki 11 ngut ki MLA ka Congress kila leit ban pyniasoh noh bad ka All India Trinamool Congress (TMC) ha u Naiwieng 2021, hadien ba ki nongialam kiba ha khlieh jong ka Congress kila thung ia u MP ka Shillong u Bah Vincent H Pala kum u President jongka Meghalaya Pradesh Congress Committee (MPCC).
Ka Deborah kala iaroh ia ki nongialam bad ki nongkitkam ka seng kiba laneh beit haka seng Congress watla ki nongialam kila mih ban pyniasoh noh bad kiwei pat ki seng saiñ pyrthei.
Kala ong, ba ka seng kan sa khmih bniah ha ka jingpynieng ia ki kyrtong ha ka elekshon MDC bad kala ong ba ki nongkitkam bad ki nongkyrshan kila don beit bad ka seng Congress watla katto katne ngut ki nongialam kila mih noh.
Katba u u nongialam ka seng Congress uba long ruh u Opposition Chief Whip, u Saleng Sangma, ula ong ba ka Congress kadei kaba la synshar ne kaba don ha ki sorkar synroplang jong ka jylla Meghalaya hynrei ha ki 5 snem kiba la leit kala don ha ka Liang Pyrshah, ia kaba ka seng kam pat ju da mad ha ki snem kiba mynshwa, hynrei ka seng kala ioh ia ka jingshemphang bad kan sa wanphai da kaba khlain namar ba ka bteng ban ioh iaka jingkyrshan kaba skhem na ki nongtrei jong ka seng bad na ki shnong ki thaw.
