Itanagar, Nailar 03 : Da ka ba kyntait halor kano kano ka jingdon jingiadei bad ki kam sain hima halor ka jingiakhih pyrshah ia u Myntri Rangbah (CM) ka Arunachal Pradesh, na ka liang u president ka Arunachal Against Corruption (AAC) u Tarh Tahar u la ong ba kane ka kynhun ka long ka ba la pynkhreh ban ngat ha kino kino ki jingshah pynshitom lada u CM Pema Khandu un ujor mukotduma ha ka ba iadei bad ka jingiakhih ka ba dang iai bteng jong ki bad halor ki jingkynnoh kam bamsap.
Ka AAC ka la kynnoh ia u CM Khandu halor ka jingpyndonkam bakla ia ka pisa ka ba haduh T.142 klur ka ba hap hapoh ka Deen Dayal Upadhyaya Gram Jyoti Yojana.
Kham hashwa, ha ba pynphai halor katei ka jingkynnoh, na ka liang u Khandu u la pynpaw lyngba ki lad pathai khubor ba kane ka jingkynnoh ka dei tang ka jingpyrshang ban pynjah burom ia ka sorkar, bad u la ong ruh ba shen un ujor da ka mukotduma pyrshah ia kane ka kynhun.
Ha ba kren sha ki lad pathai khubor ha ka sngi Nyngkong ba la lah, u president ka ACC u la ong ba lada u CM u long u ba shida kumta ruh u dei ban iehnoh kam halor ka nongrim jong ka jingsngewkhia bad ban ailad ia ka tnat tohkit ba kan pynlong ia ka jingtohkit ka ba khuid bad ka ba laitluid.
“Lada kam don kano kano ka jingbakla, kumta u lah ban iehnoh ia ka shuki jong u kham hadien,” ong u Tahar. Nalor kata u la kam ruh da ka ba ong ba ka ACC ka long ka ba la pynkhreh ban iakynduh ia kano kano ka jingialeh.
“Ngi don ia baroh ki kot ki sla ki ba pyni halor ka jingdonkti jong u CM ha kane ka kam bamsap. U dei ban pynbna paidbah ba baroh ki jingkynnoh kam bam sap pyrshah ia u ki long ki bym shisha bad ba u long u ba kloi ban shah tohkit ha kino kino ki tnat tohkit,” ong shuh shuh u Tahar.
Shuh shuh u Tahar u la ong ruh ba u CM ka Arunachal u dei ban shah buh jingkylli kumba long kiwei pat ki nongialam sain hima ki ba la ngat ha ka jingshah tohkit ha ka CBI bad ED khnang ban lap ia ki jingshisha baroh.
Shwa kane, ka All Arunachal Pradesh Abotani Students’ Union (AAPATSU) hapoh ka jingialam jong u president, u Langpu Apon ruh ka la pynlong ka jingleit jngoh ia ki dkhot ka ACC bad pynthikna halor ka jingai jingkyrshan ia ka jingiakhih ka jong ki.
U Apon u la kyntu ruh ia ki dkhot ka ACC ba kim dei ban randien na kane ka jingialeh ka jong ki bad ban iakhun haduh ka ba kut pyrshah ia ki kam bamsap. Nalor kata u la kynnoh ruh ba kane ka sorkar jylla ka ba mynta ka long ka ba mynthi ban pynsngap ia ka sur jong ki riew paidbah.
Shuh shuh ka AAPATSU ka la dawa ruh ban pynduh noh ia ka Non-APST na ka Panchayati Raj, hynrei na ka liang ka sorkar kam shym la don ia ka mon ban leh ei ei na ka bynta ka bha ka miat jong ka jylla, ong u Apon.
Ha ka sngi U Blei ba la lah, shibynta ka jingiakhih ka jong ki, ki dkhot ka AAC ki la khi ia la ki jong ki niuhkhlieh bad kam ba lada ka sorkar kam jubab ia ka jingdawa ka jong ki, kane ka kynhun kan her sha Delhi.
