Ka Congress ha u 2018 palat 20 ki jop mynta pat ‘0’
Shillong, Nailar 3 : U MLA barim ka Congress na Mawphlang ba lah pyn iasoh sha ka NPP, Bah Kennedy Khyriem u la ong ba ki don bun ki daw kiba pynlong ia u ban ia khlad lok noh bad ka Congress bad poi iasoh noh sha ka National People’s Party, ka party kaba ialam ia ka bor synshar mynta ha ka jylla.
“Peit ha u 2018 ka Congress ka jop palat 20 ngut ki MLA hynrei mynta pat ym don shuh uwei pat. Kane kadei kawei na ki daw kiba pynlong ianga ban mih noh namar ngam kwah ban sah marwei,” u la ong.
U Bah Kennedy u la iathuh ruh ba kawei pat ka daw kaba pynlong ia u ban iapbiej ia ka NPP kadei namar ka nud ban shim ia ki ishu kiba ym don kiwei pat ki sorkar ki nud ban tuklar khamtam eh ia ka ishu khappud kaba la shu ieh kumto da ki phew phew snem.
“Dei na kane ka daw ba manga ryngkat kumba 80 persen ki nongkyrshan jongnga ngi la shim ia ka rai ban khlad lok noh bad ka Congress bad pyniasoh pat sha ka NPP,” u la ong. Nangta u ong ruh ba lada u neh sah bad ka Congress un shu kut beit tang bad ki 9000 vote kiba u ioh ha ka elekshon shiteng samoi hynrei mynta pat da ka jingdon bad ka NPP, khlem artatien ki nongkyrshan jong u Bah Lamphrang Blah kiba poi haduh 5000 tam kin ia treilang ha ka elekshon ban wan ban pynjop ia ka NPP ha u 2023.
Ban shu pynkynmaw, u Bah Kennedy u dei ruh u President jong ka East Khasi Hills District Congress ha shwa ba un resain bad iasoh noh sha ka NPP. Ia utei unongmihkhmat barim ka Mawphlang la leit ruh ban pdiang burom da u Myntri Rangbah ka jylla ba dei ruh u National President ka NPP kumjuh u National Vice President Bah Prestone Tynsong ha ka jingialang kaba heh bha kaba long ha Mawphlang dang shen.
Ha katei ka jingialang hi, u Conrad u la pynbna ruh ba u Bah Kennedy un long u kyrtong jong ka NPP na Mawphlang ha u 2023.
