Shillong Nailur 11: U Symbud Myntri Rangbah ka jylla Bah Sniawbhalang Dhar, hynne ka sngi Balang, ula kitbok kitrwiang bad ai jingiarap T.50,000 ia ka kmie jong u Steve Jyrwa, uba iashimbynta ha ka jingiakob shad ba la tip kum ka India Best Dancer season 4 ha nongbah Mumbai.
U Bah Sniawbhalang Dhar ula aiti ia katei ka pisa ha ka kmie jong u Steve Jyrwa, ka Kong Bibi Jyrwa ha kaba la iadonlang ki bahaiing bahasem bad u President ka All Meghalaya Dancers Association (AMDA) Bah Kitbok Thabah.
U Bah Sniawbhalang ula kitbok ia u Steve uba la rung sha ka Top 6 jong katei ka jingiakob ba yn lah syndon ban rah ia ka nam lahduh ha katei ka jingiakob shad hapoh ka ri ban wanrah nam bad burom ia ka jylla bad ia ka jaidbynriew.
Nalor kane, ula kyntu ruh ia ki paidbah nongshong shnong ka jylla ba kin kyrshan ia u Steve da kaba iashimbynta ha ka jingthep vote khnang ba u Steve yn ioh ia ka jingjop ha katei ka jingiakob shad.
Ula kular ruh ia ki kmie ki kpa jong u Steve ba yn pyniakynduh ia ki bad u Myntri Rangbah ka jylla Conrad K Sangma khnang ba na ka liang ka sorkar jylla ruh kan ioh ban iarap na ka bynta ban pynsaphriang ia ki jingtip sha ki paidbah ka jylla ba kin kyrshan lem ia u Steve ha katei ka jingiakob.
U Bah Kitbok Thabah ula ong, kaba kongsan eh mynta ka long ia ki paidbah ba kin thep vote ban kyrshan ia u Steve ba yn poi sha ka thong namar kumba long, ka jingkhlain jong u Steve ka dei na ka jingioh point na ki nongbishar hynrei lada u Steve u khlain sa ha ka jingioh vote yn dang lah ban jam shaphrang ban poi syndon sha ka Grand Finale.
Ula kyntu ia ki paidbah ba kin kyrshan lem ia u Steve ba yn poi sha ka thong jong ka jingjop bad ba kin iashimbynta ha ka jingthep vote ha ka Sony LIV App lyngba ka Google Play Store bad na kawei ka Account lah ban vote haduh 50 sien ban pynthikna ba u Steve un long u lahduh ha ka India Best Dancer Season 4.
