Nongpoh, Nailar 23 : Ka skul Saiden Secondary School, hynne ka sngi Balang, kala pynlong ia ka jingialang kitbok kitrwiang ia ka Kynhun ialehkai U-17 ki Kynthei jong ka skul, ka ban mihkhmat ia ka Jylla Meghalaya sha ka National Level Subroto Cup, 2023 ha New Delhi.
Ia kane ka jingialang la pynlong hapoh ka Iingskul ban kitbok ia kane ka kynhun ka ban leit pyntbit shen ialade sha Nongbah Shillong ban pynkhreh ia kane ka lympung ialehkai phutbol ba heh duh ki skul hapoh ka Ri.
Ha kane ka sngi la ïa donlang u Bah S. Pakyntein, Sub Inspector ka Ri Bhoi District Police, u Bah EK Lapang, Rangbah Shnong ka Saiden bad ruh u Chairman ka Managing Committee jong ka Saiden Secondary school, u Bah Sumarlang Swer, Coach bad ki nonghikai bad kiwei kiwei.
Haba kren ha kane ka sngi, u Bah S. Pakyntein u la pynpaw ia ka jingkmen ban ia donlang bad kane ka kynhun ialehkai jong ki kynthei napoh ka Saiden Secondary School lem bad ki bor pyniaid skul, ha kaba yn lah ban ai ia ki jingkitbok kitrwiang ia ka kynhun hashwa ba kan mih na ka shnong Saiden ban leit pyntbit shuh shuh hashwa ban leit shimbynta pat sha nongbah Delhi.
Kum u wei na ki nongai mynsiem, u Bah Pakyntein u la kyntu ia ki thei ialehkai baroh, ba kin long kiba minot bad kohnguh ia ki nonghikai pyntbit kiban ai ia ki buit ialehkai bapher bapher ha nongbah Shillong, khnang ba kum ka kynhun kan lah ban shah pyntbit bha hashwa ban aireng bad ki kynhun na kiwei kiwei ki jylla ha ka National Level Subroto Cup.
La ioh ruh ia ki kyntien kyntu kynpham bad ka jingkitbok na u Bah EK Lapang u ba la ai mynsiem ia ki thei ialehkai da kaba kyntu ruh ba kim dei pat ban shah ialam bakla ha kino kino ki jingsniew haba ki mih na la iing ban leit sha nongbah Shillong ne wat ha nongbah New Delhi, ha kaba kum u wei na ki nonghikai ka skul Saiden, u Bah Lapang, u la kular ruh ban pynioh ia ki jingdonkam jong kane ka kynhun jong ka Saiden SS.
Pule ruh: Hiar u DGP sha Ri-Bhoi ban ialap pyrshah ia u droks, kot 2.5 lak ki nongdih droks ha Jylla
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
