Shillong, Nailar 21 : Ka Meghalaya Football Association (MFA) kala ai ka jingkitbok kitrwiang ia ka Shillong Lajong FC ka ban iakhun ia ka quarter phainal pyrshah ia ka East Bengal FC ha ka lympung Durand Cup 2024 ban long mynta ka janmiet por 7 baje.
Ki Nongkitkam ka MFA ba ialam da u President Bah Hamletson Dohling, kala pynkup burom ia ki Official ka club bad ai sngewbha ia ka song pisa haba kitbok ia ka Lajong ba kan leh bha.
Ka Club ruh kala ai sngewbha kylliang ia u President ka MFA da ka jersey ka Lajong bad ai khublei ia ka Association halor kane ka jingkyrshan.
Ka MFA kala kyntu ia baroh ki nongkyrshan ba kin wan pyndap ia ka madan Jawaharlal Nehru Stadium ha Shillong ban kyrshan iala ka jong ka kynhun nala iing.
