Nongpoh, Lber 03: Kum shibynta ban ai mynsiem bad ban pynshlur ia baroh ki samla kiban ialeh ia ki eksam naduh ka SSLC, HSSLC, ka seng Khasi Student Union (KSU) Nongpoh Unit ka la kitbok ia baroh ki samla pule ba kin lah ban ialeh bha ha kitei ki eksam kiba dang iaid shait shait ha baroh kawei ka jylla.
Na ka liang u President Samla Iabhalang Nongrum, u la iathuh, ba ka seng ka kwah ban nang iai ai mynsiem ia baroh ki samla kiban ialeh ia la ki eksam bapher bapher mynta u snem ba kin nang lah ban ialeh bha ha kine ki eksam ki jong ki bad ba kin lah pat ban kheit ia u soh jong ka jingjop.
U la pynpaw ia ka jingsngewkhia kaba jur halor ka jingpynlip bording ba khah khah jong ka tnat treikam MeCEL kaba la ktah jur ia ki samla pule kiba dang pynkhreh ia ki eksam bapher bapher ki jong ki. Kala kyntu jur ia kane ka tnat ba kan shimkhia ban pynbiang ia ka bording ha kine ki sngi ban wan.
