Guwahati, Nailur 15 :Ka seng Congress ha Assam ha kine ki sngi ki ban dang wan ka lah ban nang duh shuh shuh sa kumba katto katne ngut ki nongialam jong ka.Ia kane la kam ym da kiwei pat, hynrei da u president ka seng Congress ka jylla u Bhupen Borah.
Haba kren sha ka lad pathai khubor, une u heh nongialam ka Congress u Bhupen Borah ula ong ba ki nongialam kiba shim kabu kiba don hapoh ka congress ki lah ban iehnoh ia ka party ha kine ki khyndiat por ki ban wan.
“Ha kine ki sngi ki ban wan, ngi lah ban iohi shuh shuh ia ki nongialam na ka Congress ki ban iehnoh ia ka party.Kine ki nongialam kiba thmu ban iehnoh kam ki dei ki riew shim kabu,” ong utei u nongialam ka Congress.
“Nga thikna ba ngin duh noh sa ia katto katne ki nongialam.Kine ki dei ki jingjia kiba la sngew thikna,” ong shuh shuh utei u president ka party.Watla katta ula ong pat ba ka Congress ha Assam kala dep ban pynkhreh lypa ban thung bujli da kiwei pat ha ki jaka jong kine.”
Nalor kata une u nongialam Congress ka Assam ula kynthoh ruh ia ka sorkar synshar BJP ha ka jylla halor ka jingpyrshang ban pynpait pynpra ia ka party Congress.
“Ka BJP kala pyrshang borbah ban pynpait pynpra ia ka seng Congress ha ka jylla namar ka dang iai long hi ka liang pyrshah kaba khlainbor,” ong u Borah.
Haba kren halor ki jingthmu jong ka seng Congress ka Assam ha kaba iadei bad ka Lok Sabha ilekshon 2024, u Bhupen ula ong; “Ngin thaw ia ka kynhun kaba iatylli pyrshah ia ka kynhun ka BJP ha ki general election.”
