Na Tripura leit kem ki pulit ia uba donkti ha kaban shim ia ka jingim u dkhot ka ACHIK
Tura, Rymphang 14: Ki pulit jong ka West Garo Hills kila iohkem ia uwei uba la phet rieh sha Tripura uba donbynta hakhmat eh halor ka jingshah pyniap u dkhot ka ACHIK ha ka shnong Goalgaon hapoh jong ka Rajabala ha u bnai Kyllalyngkot.
Da ka jingioh kem ia une, mynta ka jingshah kem baroh kala kot sha ka 13 ngut.
Ha katei ka jingjia, la shim ia ka jingim jong u dkhot ka seng ACHIK bad kane kala pynmih ia ka jingiakynad ha ka thain Rajabala ha u bnai bala dep.
Ki pulit kila iathuh, ba u Mozidul Islam uba na Bhaitbari, Rajabala uba dei uba hakhmat eh ula phet krad ban lait shah kem ha ki pulit bad ula leit ban phet rieh sha Agartala, Tripura. Hadien ka jingioh ia ki jingtip kiba paka, ka Special Team na West Garo Hills kala mih ha ka 12 tarik ban leit sha Agartala.
La shem ia u Islam na kawei ka iing kaba ula sah wai bad la kem ia u lyngba ka jingdon ia ka jingiatreilang ha ka jingkhynra bad la wan ialam noh ia u sha Tura hapoh ka jingsynran ki pulit bad la ialam ha ka iingkashari ha ka sngi Thohdieng ha kaba kala hukum ban set ia u hapoh jong ka Judicial Custody.
Hashwa ka miet jong ka sngi Thohdieng ha ka 9 tarik u Rymphang, ki pulit kila pynlong ia ka jingkhynra ha Bhaitbari bad kila iohkem ia uwei uba la tip kum u Gulbahar Sheikh (45).
Hadien ar sngi, la kem sa ia u Mominul Hoque (40) na shnong Sidakandi ha Rajabala hadien ka jingpynlong ia ka jingkhynra.
Ki pulit kim pat kren shai ba kin sangeh noh ia ka jingkem ia ki briew bad ka jingtohkit kan dang iai bteng.
