Shillong, Lber 30 : Ka jingai bhah ia ki commercial LPG sha baroh ki Jylla kynthup ka Meghalaya kala kiew sha ka 70% na kaba ju ai, pyntip ka Director ka Food, Civil Suppliers and Consumer Affairs Saloni Verma ha ka sngi Nyngkong bad bynrap ba ki domestic LPG kin iai neh kumjuh wat hapdeng ki jingieng lain ha ki jaka sam LPG.
“Katba ka jingiakren ka dang iai bteng bad ka Sorkar India kala shim jingkhein ia ka jinglong jingman ha kiwei ki Jyla, kila pynkiew ia ka jingpynpoi ia ki LPG commercial. Ia mynta, ka jingai LPG commercial kala kiew sha ka 70% na kaba ju ai sha baroh ki Jylla” ong ka Verma haba iakren bad ki nongthoh khubor.
Ka Verma kala ong “Mynta ngi dei hok ban ioh 70% bad ka jinglong jingman kan sa kham biang na ka bynta ki tourism operator, ki dhaba, ki restaurant bad ki hotel” haba pyntip ba ka Sorkar India kala pynjari ia ka 20% ka jingpynduna ia ki LPG commercial naduh ka 11 tarik Lber namar ka jinglong jingman ha Middle East kaba pynthut ia ka jingshalan.
Ka Meghalaya ka donkam kumba 1000 cylinder ha ka shisngi, namar ka 20%, ka jingpoi cylinder kala hiar sha ka 200-250 shisngi, kaba wanrah ia ka jingduna na ka bynta ki hotel, dhaba bad ki restaurant.
Ki hospital bad ki jaka pule ki dang iai bteng ban ioh beit pura ia ka jingsam LPG.
Naduh ka 25-27 tarik Lber, ka jingpoi LPG ba manla ka sngi kala kiew sha ka 300-350, kala iathuh bala pyntip ba ka jingai LPG ha kine ki lai sngi bana leit noh kala kot sha ka 400 namar ka jingtreikam ka 70% ka jingpynkiew bhah.
Ha kawei ka liang, ka Director kala pyntip ba kam shym la don satia kano kano ka jingthut ha ka jingsam ia ka domestic LPG.
Shuwa ka jingpoi duna gas, ka jingsam ia ka domestic LPG ka long hapdeng 6000-7000 cyliner ha ka shisngi, bad hadien ka 11 tarik Lber, ka Jylla kala lah ban ai hapdeng 5000-7000 shisngi.
Halor ka jingieng lain u paidbah ha ki jaka sam gas, ka Director kala ong ba kane ka jingieng lain ka dei namar ka jingdonkam ban leh ia ka e-KYC na ka bynta ka De-duplication certificate ba donkam ia kiba leh connection thymmai, ka sienjam kaba ki kompani kila pyntreikam ban khanglad ia ka jingthied ban pynlang ia ka LPG. Hapdeng ka 25 bad 27 tarik Lber, ka Jylla kala sam haduh 22,094 tylli ki domestic cylinder.
Ka Verma kala kyntu ia ki lad pathai khubor bad ki paidbah ba kin kiar na ki jingkam ba duna LPG kaba lah ban pynkhuslai bad pynkulmar jingmut ia u paidbah.
“Ngi la dep thung ia ki District LPG Monitoring Committee, State Level LPG Monitoring Committee bad kine kila peit thuh bha ia ka jinglong jingman” pyntip ka Director.
