Shillong, Naiwieng 01: U Piat ula bteng ban kiew dor hapoh Shillong kaba dei ka nongbah jong ka jylla Meghalaya bad ha kiwei ki bynta jong ka jylla ha ka sngi Baar.
Ka ri sa shisien kala mad biang ia ka jingkiew dor khah khah jong u piat kumba ju long man la u snem. Hynriew bnai mynshwa, ka dor kala long T.20 sha ka T.30 shi kilogram, hynrei ka dor u piat ka la long T.70, T.80, T.90 bad T.100 shi Kg ia mynta bad kane ka dor kala lah ban kot sha ka T.150 shi Kg.
Ha ka sngi u Blei ka dor jong u piat ka long T.80 shi Kg ha Laitumkhrah bad T.90 shi Kg ha Ïewduh.
Ha ka sngi Baar, ka dor jong u Piat kala kot shaka T.100 shi Kg
Kane ka jinghiar bad ka jingkiew dor jong u piat kala pynlyngngoh ia ki paidbah khamtam ia ki nongthied nongpet bad ia baroh kiba don bynta.
Katkum ki jingtip ba la iohlum, la iathuh ba ha ka ri India baroh kawei ka dor die khutia ia u piat kala kiew da T.3.40 shi kg sha ka T.53.75 shi Kg ha ka Sngi Baar.
Katkum ka jingiathuh jong u Heh ophisar ka sorkar pdeng, ba kala don ka jingslem ban thung ia u piat namar ka jingbym long ka suinbneng bad kumta ula mih tang malu mala bad u piat ynmih slem bad la khmih lynti ba u piat ula dei ban mih noh mynta hynrei ym shim la mih satia, kumta kala don ka jingduna bha jong u piat bad kane kala pynmih kylla iaka jingkiewdor ha ka jingdie kyllum bad jingdie khutia.
Haduh mynta 1.8 lak ton u piat la dep ban pyllait sha ki iew ki hat bad haduh 15 lak ton u piat la dep ban khaii shabar ri haduh ka 20 tarik u Risaw.
Katkum ki jingtip kiba la iohlum, kala don ka jingshalan ia u piat haduh 25 lak ton u piat ha u snem 2022–23.
