Shillong, Rymphang 10 : Ka jingiap jong ki nongbylla tih dewiong na ka jingbthei ka par ha Mynsngat-Thangsko, East Jaintia Hills, kala kiew sha ka 30 ngut, da ka jingiap sa arngut kiba mynsaw hynne ka sngi Ba-ar ha kawei ka hospital ha Silchar.
Kine baroh arngut ki dei ki nongshongshnong ka Katigorah kaba don ha Cachar District bad la sumar ia ki ha Silchar Medical College and Hospital (SMCH). Kine ki arngut ki kyrteng u Nimaruddin bad Ramcharan Baishnab.
“Arngut ki briew ba mynsaw na ka jingbthei ka par dewiong kila iap ha SMCH Hospital ha ka miet sngi Nyngkong” ong ki bor khmih ka Tnad ka Koit ka Khiah.
Baroh lang, haduh 9 ngut ki nongbylla ba mynsaw la pynkit ban sumar ha SMCH hadien ka jingjia ba 5 tarik Rymphang.
Ka Sorkar Jylla kala hukum ban pynlong da ka Judicial Inquiry halor kane ka jingjia ban pynthikna ia ki daw kaba lam sha kane ka jingbthei nalor ban tynrong ia ka jingbahkhlieh.
Na ka liang ka Sorkar Assam kala pynbna ia ka song jingiarap ba T.5 lak sha ki bahaiing jong ki briew kiba iap, kiba dei na Assam. Ka khubor ka iathuh ba phra ngut na ki nongbylla ba iap ha kane ka jingjia ki dei kiba na Cachar District.
